जनकपुरधाम । मधेश प्रदेशका महिला सांसदहरुलाई जलवायु उत्थानशील, विपद् जोखिम न्यूनीकरण र सञ्चार तथा नेतृत्व क्षमता अभिवृद्धि सम्बन्धी तालिम दिइएको छ ।
सामुदायिक सुधार केन्द्र (सीआईसी) को समन्वय र यूएनडीपीको सहयोगमा मधेश प्रदेश सभाद्वारा सम्पन्न सो तालिममा सहभागिर्ता जलवायु उत्थानशील, विपद् जोखिम न्यूनीकरण र सञ्चार तथा नेतृत्व क्षमता अभिवृद्धिका लागि विज्ञ तथा प्रशिक्षकहरुद्वारा तालिम दिइएको छ ।
कार्यक्रममा जलवायु उत्थानशील, विपद् जोखिम न्यूनीकरणमा विज्ञ सुमन कर्ण र सञ्चार तथा नेतृत्व क्षमता अभिवृद्धि बारे मधेश प्रदेश पत्रकार महासंघका पूर्व अध्यक्ष पत्रकार राजेश कुमार कर्णले प्रशिक्षण दिएको जनाइएको छ ।
विज्ञ सुमन कर्णले जलवायु परिवर्तन के हो, किन हुन्छ यसका कारक तत्वहरु, यसले जनजीवन तथा प्रकृतिमा पारिरहेको प्रभाव, यसको न्यूनीकरणमा सांसदहरुले गर्न सक्ने भूमिका बारे जानकारी गराएका थिए भने पत्रकार कर्णले सञ्चार भनेको के हो, यसका प्रकार, महत्व र हाल सामाजिक सञ्जालबाट लिन सकिने फाइदा र बेफाइदा बारे जानकारी गराएका थिए ।
कार्यक्रममा प्रमुख अतिथि प्रदेश सभाका सभामुख रामआशिष यादवले वायु, जल, माटो र वातावरण बारे आफ्ना धारणा राखेका थिए । उनले जल प्रदुषण, जमिन प्रदुषण, वायु र ध्यनी प्रदुषण बारे विस्तारमा जानकारी गराउंदै यसले जलवायु परिवर्तनमा पारिरहेको असर बारे बताएका थिए ।
सभामुख यादवले खासगरी प्लास्टिकजन्य फोहोरले जलवायु परिवर्तनमा पारिरहेको असर बारे जानकारी गराउंदै यसको प्रयोगमा नियन्त्रण तथा वैकल्पिक माध्यम अपनाउन सांसदहरुले समाजमा गएर प्रचार प्रसार गर्नुपर्नेमा जोड दिएका थिए ।
उनले भने प्लास्टिक प्रयोगमा निर्मूल नपारिए आउंदो २० वर्षमा जनजीवनमा निकै असर पर्ने भएकाले यसप्रति सबै सजग र सचेत हुनुपर्ने आवश्यकता छ । कार्यक्रमको स्वागत मनतव्य यूएनडिपीका बिटुबाबु श्रीवास्तवले गरेका थिए ।
यो विषयमा आफ्नो प्रतिक्रिया दिनुहोस् !