जनकपुरधाम । जनकपुरधाम उपमहानगरपालिका–७, जिरोमाइलमा मिथिलाको मौलिक संस्कृति, ग्रामीण परिवेश र स्थानीय स्वादलाई केन्द्रमा राखेर ‘बाँस वाटिका’ रेस्टुरेन्ट तथा पार्टी प्यालेस सञ्चालनमा आएको छ।
बाँस वाटिकाको औपचारिक उद्घाटन बिहीबार बिहान १० बजे मधेश प्रदेश सभाका सभामुख रामआशिष यादवले गर्ने कार्यक्रम तय गरिएको सञ्चालकले जनाएको छ। उद्घाटन समारोहलाई सांस्कृतिक तथा स्थानीय उत्पादनको प्रवद्र्धनसँग जोड्दै मिथिला कला, राखी तथा स्थानीय उत्पादनको प्रदर्शनी र विशेष तीज सांगीतिक कार्यक्रम आयोजना गरिनेछ।
बुधबार आयोजित पत्रकार सम्मेलनमा सञ्चालक समितिका नवीन साहले बाँस वाटिकालाई सामान्य रेस्टुरेन्ट वा पार्टी प्यालेसका रूपमा मात्र सीमित नराखी मिथिलाको कला, संस्कृति, खानपान र स्थानीय उत्पादनको प्रवद्र्धन गर्ने साझा थलोका रूपमा विकास गर्ने लक्ष्य रहेको बताए।
उनका अनुसार उद्घाटनका क्रममा आयोजना हुने प्रदर्शनीमा मिथिला चित्रकला, हस्तकला, राखी तथा विभिन्न स्थानीय उत्पादन राखिनेछन्। स्थानीय कलाकार, हस्तकला व्यवसायी, उद्यमी र उत्पादकलाई आफ्ना सिर्जना तथा सामग्री सार्वजनिक गर्ने अवसर प्रदान गर्ने उद्देश्यले प्रदर्शनी आयोजना गरिएको हो।
‘स्थानीयस्तरमा प्रतिभा र उत्पादनको कमी छैन, तर त्यसलाई बजार र उपभोक्तासम्म पुर्याउने उचित मञ्चको अभाव छ,’ साहले भने, ‘बाँस वाटिकालाई त्यस्ता कलाकार र उद्यमीका लागि पनि एउटा साझा प्लेटफर्म बनाउने हाम्रो प्रयास हो।’
बाँस वाटिकाको अवधारणामा मिथिला संस्कृति र ग्रामीण जीवनशैलीको झल्को दिने वातावरणसँगै स्थानीय परिकारलाई प्राथमिकता दिइएको सञ्चालकले जनाएको छ। यसमार्फत स्थानीय स्वाद र मौलिक आतिथ्यलाई नयाँ पुस्ता तथा बाह्य आगन्तुकसम्म पुर्याउने लक्ष्य राखिएको छ।
उद्घाटन समारोहमा तीज विशेष सांगीतिक कार्यक्रमसमेत हुनेछ। नेपाली महिलाको महत्वपूर्ण सांस्कृतिक पर्व तीजलाई लक्षित गर्दै विभिन्न सांगीतिक तथा सांस्कृतिक प्रस्तुति राखिने आयोजकले जनाएको छ।
उद्घाटन कार्यक्रममा सहभागी हुने अतिथिका लागि प्रवेश निःशुल्क रहनेछ भने आगन्तुकलाई विभिन्न स्थानीय तथा विशेष परिकारको स्वाद लिने अवसरसमेत प्रदान गरिने साहले जानकारी दिए।
बाँस वाटिकाले रेस्टुरेन्ट तथा पार्टी प्यालेसको व्यावसायिक अवधारणासँगै स्थानीय कला, संस्कृति, उत्पादन र उद्यमशीलतालाई जोड्ने प्रयास गरेको जनाएको छ। आयोजकका अनुसार आगामी दिनमा पनि स्थानीय कलाकार र उत्पादकलाई केन्द्रमा राखेर विभिन्न सांस्कृतिक तथा प्रवद्र्धनात्मक कार्यक्रम सञ्चालन गरिनेछ।
यो विषयमा आफ्नो प्रतिक्रिया दिनुहोस् !