जनकपुरधाम । जिल्ला प्रहरी कार्यालय धनुषाले बैंकको नाम र लोगो दुरुपयोग गरी सामाजिक सञ्जालमार्फत भईरहेको साइबर बच्न सर्वसाधारणलाई आग्रह गरेको छ ।
धनुषा प्रहरीका अनुसार पछिल्लो समय ह्वाट्सएप, इमो, भाइबरलगायतका माध्यमबाट अपरिचित व्यक्तिले बैंकका ग्राहकलाई सम्पर्क गरी ‘केवाईसी अपडेट’ गर्नुपर्ने भन्दै विभिन्न विवरण माग्ने गरेका छन्। कतिपयले तोकिएको समयभित्र विवरण अपडेट नगरे बैंक खाता बन्द हुने भन्दै ग्राहकलाई त्रसित बनाउने गरेका छन्।
ठगीमा संलग्न व्यक्तिहरूले बैंककै नाम, लोगो तथा पहिचान झल्किने विवरण प्रयोग गरेर नक्कली सामाजिक सञ्जाल अकाउन्ट बनाउने गरेको प्रहरीको भनाइ छ। त्यस्ता अकाउन्टबाट नागरिकताको प्रतिलिपि, बैंक खाता नम्बर, लगइन विवरण, पासवर्ड तथा ओटीपीजस्ता संवेदनशील जानकारी मागिने गरेको पाइएको छ।
केही घटनामा ग्राहकलाई एटीएम कार्ड तथा चेकबुकसमेत कुरियरमार्फत पठाउन लगाउने प्रयास भएको प्रहरीले जनाएको छ। यस्ता संवेदनशील विवरण वा बैंकिङ सामग्री अपरिचित व्यक्तिको हातमा पुगेमा खातामा रहेको रकम चोरी हुनसक्ने तथा पीडितले आर्थिक र कानुनी समस्या व्यहोर्नुपर्ने जोखिम रहेको प्रहरीको भनाई छ ।
जिल्ला प्रहरी कार्यालय धनुषाले कुनै पनि अपरिचित व्यक्ति, फोन नम्बर, लिंक वा शंकास्पद सामाजिक सञ्जाल अकाउन्टमार्फत आएको बैंकसम्बन्धी अनुरोधमा विश्वास नगर्न आग्रह गरेको छ। विशेषगरी नागरिकता, बैंकिङ पासवर्ड, ओटीपी, एटीएम तथा अन्य गोप्य विवरण कसैलाई पनि नदिन प्रहरीले अनुरोध गरेको हो ।
बैंकबाट आएको भनिएको कुनै सूचना वा केवाईसी अद्यावधिक गर्नुपर्ने अवस्था भए सम्बन्धित बैंकको आधिकारिक वेबसाइट, सम्पर्क नम्बर वा नजिकको शाखामार्फत जानकारी लिन प्रहरीले सुझाव दिएको छ ।
जिल्ला प्रहरी कार्यालय धनुषाका प्रवक्ता तथा सूचना अधिकारी प्रहरी नायव उपरीक्षक ओमप्रकाश खनालले प्रविधिको प्रयोगसँगै साइबर ठगीका शैली पनि परिवर्तन हुँदै गएकाले नागरिकले डिजिटल कारोबारमा विशेष सावधानी अपनाउनुपर्ने बताएका छन् ।
उनले शंकास्पद लिंक, अकाउन्ट वा व्यक्तिबाट बैंकिङ विवरण मागिएको पाइए तत्काल प्रहरीलाई जानकारी गराउनसमेत आग्रह गरेका छन् ।
यो विषयमा आफ्नो प्रतिक्रिया दिनुहोस् !