कानून उल्लंघन गर्नेलाई कडा कारबाही गर्ने मन्त्री महताेकाे चेतावनी
जनकपुरधाम । मधेश प्रदेश सरकारले नागरिकको स्वास्थ्य, सुरक्षा तथा सेवा प्रवाहसँग प्रत्यक्ष जोडिएका क्षेत्रमा हुने बेथिति नियन्त्रण गर्न अनुगमनलाई थप प्रभावकारी बनाउने भएको छ।
प्रदेश सरकारको गृह, सञ्चार तथा कानून मन्त्रालयले कानून र निर्धारित मापदण्डविपरीत काम गर्ने व्यक्ति, संस्था तथा व्यवसायीमाथि कडा कारबाही गर्ने चेतावनी दिएको छ।
गृह, सञ्चार तथा कानूनमन्त्री फकिरा महतोले जारी गरेको विज्ञप्तिमा सरकारी कार्यालयमा हुने ढिलासुस्ती र गैरजिम्मेवार कार्यशैलीदेखि बजारमा देखिने अनियमिततासम्मलाई नियन्त्रण गर्न प्रदेश सरकारले निगरानी तथा अनुगमनलाई तीव्रता दिएको उल्लेख छ।
मन्त्रालयले सर्वसाधारणको दैनिक जीवनसँग प्रत्यक्ष सम्बन्ध राख्ने होटल तथा रेस्टुरेन्ट, औषधि पसल, अस्पताल, विद्यालयका दिवा खाजा कार्यक्रम तथा खाद्य र पेय पदार्थको उत्पादन, बिक्री र वितरणमा विशेष निगरानी बढाएको जनाएको छ।
उपभोक्ताको स्वास्थ्य र अधिकारमा असर पार्न सक्ने गतिविधिमाथि नियमित रूपमा अनुगमन भइरहेको मन्त्रालयको भनाइ छ।
निर्धारित मापदण्ड पूरा नगरी व्यवसाय वा संस्था सञ्चालन गर्ने, म्याद नाघेका वा गुणस्तरहीन वस्तु बिक्री गर्ने, कृत्रिम रूपमा मूल्य बढाउने तथा सेवाग्राहीलाई ठगी गर्ने कार्यमा संलग्नलाई प्रचलित कानूनअनुसार कारबाही गरिने मन्त्रालयले स्पष्ट पारेको छ।
मन्त्रालयले व्यवसायी, उद्योगी तथा सेवा प्रदायकलाई आफ्नो व्यवसायप्रति जिम्मेवार र पारदर्शी बन्न आग्रह गर्दै निर्धारित मूल्य, गुणस्तर तथा अन्य कानुनी मापदण्डको पालना गर्न निर्देशन दिएको छ।
नागरिकको स्वास्थ्य, सुरक्षा र अधिकारसँग जोडिएका विषयमा कुनै किसिमको लापरबाही वा मनोमानी स्वीकार्य नहुने मन्त्रालयले जनाएको छ।
सुशासन र प्रभावकारी सेवा प्रवाहलाई प्राथमिकतामा राख्दै कानून कार्यान्वयनमा सरकार कठोर रूपमा प्रस्तुत हुने संकेत मन्त्रालयको विज्ञप्तिले दिएको छ।
मन्त्रालयले कानून सबैका लागि समान भएकाले नियम उल्लंघन गर्ने जोसुकैलाई पनि कानुनी दायरामा ल्याइने प्रतिबद्धता जनाएको छ।
यो विषयमा आफ्नो प्रतिक्रिया दिनुहोस् !