जनकपुरधाम । धनुषाको मिथिला नगरपालिका–६ ढल्केबरमा प्रहरीले हवाई फायर गर्दै दुई जना भारतीय नागरिकलाई खैरो हेरोइनसहित पक्राउ गरेको छ। पक्राउ परेका दुवै जनामाथि लागूऔषध कारोबारमा संलग्न रहेको आशंकामा अनुसन्धान अघि बढाइएको प्रहरीले जनाएको छ।
पक्राउ पर्नेमा भारतको बिहार राज्य, मधुबनी जिल्लास्थित हरलाखी थाना–५ निवासी २६ वर्षीय सन्तोष कुमार महतो र बासोपट्टी थाना–२ निवासी ४५ वर्षीय मिथिलेश साह रहेका छन्।
लागूऔषध नियन्त्रण ब्यूरोका एसएसपी सुवास बोहराका अनुसार शुक्रबार दिउँसो करिब २:३० बजे ढल्केबरबाट जनकपुरतर्फ जाने सडक खण्डमा प्रहरी टोलीसँग उनीहरूको जम्काभेट भएको थियो। प्रहरीलाई देख्नासाथ दुवै जना भाग्न खोजेपछि नियन्त्रणमा लिन बाध्य हुँदै एक राउन्ड हवाई फायर गरिएको उनले बताए।
प्रहरीका अनुसार भारतबाट नेपालतर्फ लागूऔषध भित्र्याएर कारोबार भइरहेको भन्ने विशेष सूचनाका आधारमा इलाका प्रहरी कार्यालय ढल्केबर र लागूऔषध नियन्त्रण ब्यूरो बर्दिबास, महोत्तरीको संयुक्त टोली परिचालन गरिएको थियो। टोलीले बसी खोलानजिक लक्ष्मीनिवासतर्फ जाने भित्री सडकमा पैदल हिँडिरहेका दुई जनामाथि निगरानी गरिरहेको अवस्थामा उनीहरू प्रहरीलाई देखेर भाग्न खोजेका थिए।
इलाका प्रहरी कार्यालय ढल्केबरका अनुसार लागूऔषध नियन्त्रण ब्यूरोबाट खटिएका असई प्रकाशराज थापाले टाइप–५४ (ठूलो चापे) चिनियाँ पेस्तोलबाट एक राउन्ड हवाई फायर गरेपछि दुवै जनालाई नियन्त्रणमा लिन सफल भएको हो।
पक्राउपछि गरिएको खानतलासीका क्रममा सन्तोष कुमार महतोको पाइन्टको गोजीबाट ९५ ग्राम ५९० मिलिग्राम खैरो हेरोइनजस्तो देखिने गिलो पदार्थ बरामद गरिएको प्रहरीले जनाएको छ।
बरामद लागूऔषधसहित पक्राउ परेका भारतीय नागरिकद्वयमाथि लागूऔषध (नियन्त्रण) ऐनअन्तर्गत थप अनुसन्धान तथा कानुनी प्रक्रिया अघि बढाइएको जिल्ला प्रहरीले जनाएको छ।
यो विषयमा आफ्नो प्रतिक्रिया दिनुहोस् !