जनकपुरधाम । मधेश प्रदेश सरकारको प्रशासनिक केन्द्र मधेश भवन भित्र पत्रकारलाई प्रवेश निषेध गरिएको छ । तर कसले निषेध गरेको हो भन्ने कुरामा मुख्यमन्त्री, मन्त्रीदेखि सुरक्षा प्रमुख सबै अनभिज्ञ छन् ।
प्रवेशद्वारमा खटिएका सुरक्षाकर्मीले पत्रकारलाई प्रवेश निषेध भनी प्रवेशमा गत दुई दिनदेखि रोक लगाउने गरेको छ । किन रोकिएको भन्ने जवाफमा माथिबाट आदेश रहेको भनी जवाफ दिने गरेका छन ।
माथिल्लो निकाय मुख्यमन्त्री कृष्ण प्रसाद यादव, गृह, सञ्चार तथा कानून मन्त्री फकिरा महतो र मधेश भवनभित्र रहेका सुरक्षाकर्मी गणका प्रमुख एसपी बुढाथोकी भन्छन आफूहरुले पत्रकारको प्रवेशमा रोक लगाएको छैन ।
आम नागरिकदेखि जनप्रतिनिधि र कर्मचारी कसैलाई पनि रोकटोक गर्दैन । प्रवेशद्वारमा गाडी इन्ट्री गराउने क्रममा पत्रकार नाम सुन्ने बितिकै पत्रकारलाई प्रवेश निषेध छ भनी रोकि दिने गरेका छन् । समाचार प्रयोजनका लागि आएको भनी आग्रह गर्दा कुन मन्त्रालयमा जानुछ, त्यस मन्त्रालयका कर्मचारी वा सचिवालयबाट फोन गर्न लगाउनु अनि मात्रै जान दिन भन्ने गरेका छन् ।
एक पत्रकारलाई प्रवेश गर्न दिदैँन, कर्मचारी वा सचिवालयको सहयाेगमा भित्र प्रवेश गरेपनि क्यामेरा लिएर प्रवेश गर्न दिदैँन, मोबाइलबाट फोटो खिच्न खोज्दा मोबाइल नियन्त्रणमा लिनेसम्म गरेका छ्न ।
सोमबार साँझ समाचार प्रयोजनका लागि पत्रकार सुभाष कर्ण मन्त्रालयमा निकै सोधपुछ पछि प्रवेश पायो । तर उनी पत्रकार फर्किने क्रममा सुरक्षाकर्मीले उनलाई फोटो किन खिचेको भन्दै नियन्त्रण शैलीमा सोधपुछ गरेका थिए । उनले आफूले कुनै तस्वीर नखिचेको र आवश्यक परे मोबाइल नै जाँच गर्न पटक पटक आग्रह निकै मसक्तपछि त्यहाँबाट जान दिइयो ।
सोही क्रममा दुई जना पत्रकारले भवनभित्र प्रवेश गर्न खोज्दा “पत्रकारहरूले फोटो खिच्छन“ भन्ने कारण देखाउँदै सुरक्षाकर्मीले प्रवेश गर्न नदिई गेटबाट फर्काई दिइयो । अहिले मधेश भवनभित्र प्रवेश गर्नुअघि सम्बन्धित मन्त्रालयका कर्मचारी वा पदाधिकारीलाई फोन गराएर पुष्टि भएपछि मात्रै प्रवेश दिने गरेका छन् ।
यो कुनै नयाँ घटना भने होइन । विगतदेखि नै “माथिबाट आदेश आएको छ“ भन्दै पत्रकारलाई भवनभित्र फोटो खिच्न नदिने र क्यामेरा प्रयोगमा रोक लगाउने कार्य दोहोरिँदै आएको पत्रकारहरूको गुनासो छ ।
करिब दुई साताअघि चुरे संरक्षण अभियानका प्रतिनिधिहरू वन तथा वातावरण मन्त्री शंकर चौधरीलाई ज्ञापनपत्र बुझाउन पुगेका बेला पनि मन्त्रालयभित्र फोटो खिच्न नदिने प्रयास भएको थियो । मन्त्रीका सुरक्षा तथा सचिवालयका कर्मचारीले तस्वीर खिच्न रोक लगाएपछि पत्रकार र मन्त्रीबीच केहीबेर विवाद भएको थियो । अन्ततः मन्त्रीले भिडियो नबनाउने सर्तमा एउटा मात्र ज्ञापन पत्र बुझाउने बेलाको तस्वीर खिच्न अनुमति दिएका थिए ।
अचम्मको कुरा के छ भने, पत्रकारमाथि भइरहेको यस्तो व्यवहारबारे प्रदेश सरकारका जिम्मेवार अधिकारीहरू भने आफूहरूलाई कुनै जानकारी नभएको दाबी गरिरहेका छन् ।
गृह, सञ्चार तथा कानून मन्त्री फकिरा महतोले प्रदेश सरकारबाट पत्रकारलाई फोटो खिच्न वा क्यामेरा लैजान कुनै प्रतिबन्ध नलगाइएको बताए । उनले पत्रकारलाई मधेश भवन प्रवेशमा रोक लगाइएको जानकारी आफूलाई नरहेको भन्दै वास्तविकता बुझ्ने प्रतिक्रिया दिए ।
मुख्यमन्त्री कृष्णप्रसाद यादवले पनि पत्रकारलाई मधेश भवन प्रवेशमा रोक लगाइएको विषय आफूलाई थाहा नभएको बताए । उनका अनुसार प्रदेश सरकारको तर्फबाट त्यस्तो कुनै निर्णय वा निर्देशन जारी गरिएको छैन र घटनाबारे जानकारी लिने बताए ।
मधेश भवनको सुरक्षाको जिम्मेवारी सम्हालिरहेका गण प्रमुख एसपी मदन बढुथोकीले समेत पत्रकारमाथि प्रवेश प्रतिबन्ध लगाउने कुनै आदेश आफूहरूले जारी नगरेको दाबी गरे । उनले पनि किन यस्तो अवस्था सिर्जना भयो भन्नेबारे बुझ्ने बताएका छन् ।
यता, नेपाल पत्रकार महासंघ प्रदेश समितिले घटनाप्रति आपति जनाएका छन् । महासंघका महासचिव शैलेन्द्र क्रान्तिले पत्रकारलाई सरकारी कार्यालय प्रवेशमा रोक लगाउनु र फोटो खिच्न नदिनु प्रेस स्वतन्त्रतामाथिको प्रत्यक्ष हस्तक्षेप भएको मुख्यमन्त्री यादवलाई ध्यानाकर्षण गराएपनि चासो लिइएको छैन ।
अब मुख्य प्रश्न उठेको छ—यदि प्रदेश सरकार, मुख्यमन्त्री, सम्बन्धित मन्त्री र सुरक्षा प्रमुख सबैले पत्रकारमाथि कुनै प्रतिबन्ध नरहेको दाबी गरिरहेका छन् भने मधेश भवनको प्रवेशद्वारमा पत्रकारलाई रोक्ने आदेश कसले दिएको हो ? सुरक्षाकर्मीले “माथिको आदेश“ भन्दै पत्रकारलाई रोकिरहेका छन् भने त्यो ’माथि’ आखिर कहाँ छ ?
मधेश भवनभित्र भइरहेका अवाञ्छित गतिविधि नरोकि समाचार प्रसारण गर्दा प्रेस स्वतन्त्रताको सम्मान गर्ने कि अदृश्य आदेशको आडमा पत्रकारलाई रोक्ने ? प्रश्न उठिरहेको छ ।
आखिर किन यस्तो ?
पत्रकारलाई मधेश भवनभित्र प्रवेशमा रोक लगाउनुको कारण के हो भन्ने केही यस्ता कुरा खुल्न आएको छ । संघीय सरकारबाट गाडीमा कालो सिसा र स्टीकरण हटाउने अभियान थालिएको छ । जनकपुरधाममा पनि ट्राफिक प्रहरीले सो अभियान थाले । तर मुख्यमन्त्री लगायत केही मन्त्रीहरुको गाडीका कालो सिसा तथा स्टीकर हटाएको छैन ।
सोही प्रकरणमा मुख्यमन्त्री यादव लगायत मन्त्रीहरुको कालो सिसा तथा स्टीकर भएको भिडियो र मधेश भित्र थुपारिएका फोहोरसहित बियरका बोतलहरुको भिडियो खिचेर, बियरको बोतलसहितका फोहोरको समाचार प्रसारण गरेको थियो । ती समाचार समाजिक सञ्चालमा भाइरल भए लगतै पत्रकारलाई प्रवेशमा रोक लगाइएको बुझिएको छ ।
मधेश भवनभित्रका गतिविधि र मुख्यमन्त्रीले संघीय सरकारको निर्देशन उल्लंघन बारे समाचार प्रसारण गर्दा प्रवेश निषेध नै गर्नु भने प्रदेश सरकारका पदाधिकारीहरुले आफ्नो गलती ढाकछोप गर्न प्रेस स्वतन्त्रतामा अंकुश लगाउने प्रयास गरेको भन्ने आलोचना सामाजिक सञ्जालमा व्यापक रुपमा भइरहेको छ ।
यो विषयमा आफ्नो प्रतिक्रिया दिनुहोस् !