जनकपुरधाम । फागुन २१ गते हुने प्रतिनिधि सभा सदस्य निर्वाचनलाई लक्षित गर्दै मधेश प्रदेशमा सुरक्षा व्यवस्था कडा पारिएको छ ।
निर्वाचन आचारसंहिता उल्लंघन रोक्न, मतदाता र मतदान केन्द्रको सुरक्षा सुनिश्चित गर्न प्रदेश प्रहरी कार्यालय जनकपुरधामले सम्पूर्ण तयारी पूरा भएको जानकारी दिएको छ ।
प्रदेश प्रहरी कार्यालयका प्रवक्ता एसएसपी कमल थापाले पत्रकारहरूसँग कुरा गर्दै भने, ‘निर्वाचन सुरक्षाका लागि नेपाली सेना, सशस्त्र प्रहरी बल, नेपाल प्रहरी र म्यादी प्रहरीसहित कुल ५० हजारभन्दा बढी सुरक्षाकर्मी खटाइएको छ । प्रदेशभरिका आठ जिल्लाका मतदान स्थल तथा केन्द्रहरूको निरीक्षण र अनुगमन कार्य पनि पूरा भइसकेको छ ।’
प्रदेश प्रहरी कार्यालयका तथ्यांकअनुसार मधेश प्रदेशमा जम्मा २ हजार १६० मतदान स्थल छन् । तीमध्ये १ हजार २४६ मतदान स्थल अतिसंवेदनशील सूचीमा परेका छन् ।
प्रदेशका ३२ निर्वाचन क्षेत्रमध्ये ७५५ मतदान स्थल उच्च जोखिममा र १५९ सामान्य जोखिममा रहेको छ । भारतीय सीमासँग जोडिएका अधिकांश मतदान स्थललाई अतिसंवेदनशील मानिएको छ । विशेषगरी सप्तरी जिल्लामा रहेका २९६ मतदान स्थलमध्ये २०९ उच्च जोखिममा छन् ।
मधेश प्रदेश प्रहरी कार्यालयका प्रमुख डीआईजी गोविन्द थपालियाले भने, ‘निर्वाचन शान्तिपूर्ण, भयरहित र निष्पक्ष वातावरणमा सम्पन्न गराउन सुरक्षा योजना योजनाबद्ध रूपमा अघि बढाइएको छ । नेपाल-भारत सीमाक्षेत्रमा विशेष निगरानी र जाँचचौकी स्थापना गरिएको छ । प्रत्येक मतदान केन्द्र र मतदान स्थलको अनुगमन कार्य पनि पूर्ण भइसकेको छ ।’
निर्वाचनको दिनदेखि सुरक्षाकर्मी मतदान बुथमा पुग्ने, चार किल्ला निर्धारण गर्ने, सूचना टाँस गर्ने र मतदान केन्द्र वरिपरि निगरानी बढाउने कार्य गर्ने योजना छ ।
यसका लागि मधेश प्रदेशका आठ जिल्लामा चार जना एसएसपीलाई जिल्लागत सुरक्षा कमान्डको जिम्मेवारी दिइएको छ ।
एसएसपी थापाले धनुषा र महोत्तरी, एसएसपी भीमबहादुर दाहालले सिरहा र सप्तरी, एसएसपी शान्तिराज कोइरालाले बारा र पर्सा र एसएसपी सुरेश काफ्लेले रौतहट र सर्लाही जिल्लाको सुरक्षा कमान्ड सम्हाल्नेछन् । उनीहरूको जिम्मेवारी निर्वाचनपूर्व सुरक्षा मूल्यांकन र योजना निर्माणमा केन्द्रित रहेको छ ।
विशेष सुरक्षा चुनौती भएका जिल्लाहरूमा सिरहा, सर्लाही, रौतहट र पर्सा पर्छन् । प्रमुख नेताहरूको उम्मेदवारी, दल परिवर्तन, धार्मिक संवेदनशीलता तथा विगतका निर्वाचनमा भएका घटनालाई ध्यानमा राख्दै सुरक्षा सतर्कता उच्च स्तरमा राखिएको छ ।
सिरहाका १५४, धनुषाका १९४, महोत्तरीका १६३, सर्लाहीका १५८, रौतहटका १५२ तथा बाराका १४५ मतदान स्थल अतिसंवेदनशील सूचीमा परेका छन् ।
मधेश प्रदेशमा कुल ४ हजार ४७१ मतदान केन्द्र रहेका छन् । यस निर्वाचनमा विभिन्न राजनीतिक दल तथा स्वतन्त्र गरी १ हजार २८ जना उम्मेदवार प्रतिस्पर्धा गर्दैछन् ।
प्रदेश प्रहरी र सुरक्षा निकायहरूले जनतालाई निर्वाचन शान्तिपूर्ण वातावरणमा सम्पन्न गराउन आग्रह गर्दै मतदान केन्द्र वरिपरि सुरक्षा सतर्कता कडा राख्ने योजना बनाएका छन् ।
यो विषयमा आफ्नो प्रतिक्रिया दिनुहोस् !