जनकपुरधाम । महोत्तरीको मटिहानी नगरपालिकाले आगामी आर्थिक वर्ष २०८३/८४ का लागि ४७ करोड ४५ लाख रुपैयाँको बजेट सार्वजनिक गरेको छ। कृषि, शिक्षा, स्वास्थ्य, पर्यटन तथा पूर्वाधार विकासलाई केन्द्रमा राख्दै नगरपालिकाले आगामी वर्षका नीति तथा कार्यक्रम अघि सारेको हो।
नगरपालिकाको १७औँ नगरसभाको खुला अधिवेशन मा नगर प्रमुख हरिप्रसाद मण्डल ले नीति तथा कार्यक्रमसहित बजेट प्रस्तुत गरेका हुन्। नगरपालिकाले उपलब्ध स्रोत–साधनलाई उत्पादनमुखी तथा जनजीवनसँग प्रत्यक्ष सरोकार राख्ने क्षेत्रमा केन्द्रित गर्ने रणनीति लिएको जनाएको छ।
प्रस्तुत बजेटअनुसार राजस्व बाँडफाँटबाट १० करोड ५७ लाख रुपैयाँ, संघीय सरकारबाट २८ करोड ८८ लाख रुपैयाँ, प्रदेश सरकारबाट १ करोड ४९ लाख ९५ हजार रुपैयाँ तथा आन्तरिक स्रोतबाट ६ करोड ५६ लाख रुपैयाँ आम्दानी हुने अनुमान गरिएको छ।
बजेट प्रस्तुत गर्दै नगर प्रमुख मण्डलले कृषि, शिक्षा र स्वास्थ्य क्षेत्रलाई नगर विकासको आधारस्तम्भका रूपमा अघि बढाइएको बताए। उनका अनुसार धार्मिक, ऐतिहासिक तथा सांस्कृतिक दृष्टिले महत्वपूर्ण मटिहानीको पहिचान जोगाउँदै समग्र नगर विकासलाई तीव्रता दिइनेछ।
कृषि क्षेत्रको आधुनिकीकरणलाई विशेष प्राथमिकता दिँदै नगरपालिकाले व्यावसायिक खेती विस्तार, पशुपालनको प्रवर्द्धन तथा युवालाई कृषि उद्यमतर्फ आकर्षित गर्ने विभिन्न कार्यक्रम सञ्चालन गर्ने भएको छ। साथै स्थानीय स्तरमा रोजगारी सिर्जना गर्न उद्योग तथा वाणिज्य क्षेत्रसँग सम्बन्धित सीपमूलक तालिम र उद्यमशीलता विकास कार्यक्रमसमेत सञ्चालन गरिने जनाइएको छ।
पर्यटन क्षेत्रलाई नगरको आर्थिक समृद्धिसँग जोड्ने लक्ष्यसहित मटिहानी मठलाई विश्व सम्पदा सूचीमा समावेश गराउन पहल गरिने भएको छ। नगरभित्र रहेका ऐतिहासिक पोखरी, जलाशय तथा धार्मिक स्थलहरूको संरक्षण, सौन्दर्यीकरण र प्रवर्द्धनमा विशेष ध्यान दिइने नगरपालिकाले जनाएको छ। साथै मठ, मन्दिर र मस्जिदलाई पर्यटकीय गन्तव्यका रूपमा विकास गरी आन्तरिक तथा बाह्य पर्यटक आकर्षित गर्ने योजना अघि सारिएको छ।
शिक्षा क्षेत्रमा नगरपालिकाले मैथिली भाषा, साहित्य र संस्कृतिको संरक्षण तथा प्रवर्द्धन लाई विशेष महत्व दिएको छ। सामुदायिक विद्यालयको कक्षा १ देखि ८ सम्म मैथिली विषयलाई एक सय पूर्णाङ्कसहित पाठ्यक्रममा समावेश गर्ने नीति लिइएको छ। त्यस्तै माध्यमिक तहका विद्यालयहरूबीच विज्ञान प्रदर्शनी मेला आयोजना गरी विद्यार्थीमा वैज्ञानिक सोच र सिर्जनशीलता विकास गर्ने लक्ष्य राखिएको छ।
विद्यार्थीहरूको सूचना प्रविधिमा पहुँच बढाउन जोडकोषमार्फत ल्यापटप वितरण गर्ने योजना बजेटमा समेटिएको छ। कक्षा ११ मा अध्ययनरत छात्राहरूलाई निःशुल्क साइकल वितरण गरिनेछ भने दलित, विपन्न, गरिब, अपाङ्गता भएका, असहाय तथा सहिद परिवारका जेहेन्दार विद्यार्थीलाई छात्रवृत्ति प्रदान गर्ने कार्यक्रम पनि सञ्चालन गरिने भएको छ।
स्वास्थ्य क्षेत्रतर्फ गर्भवती महिलाको सुरक्षित मातृत्वलाई प्राथमिकतामा राख्दै बर्थिङ सेन्टरबाट रेफर गरिएका महिलालाई जनकपुरसम्म निःशुल्क एम्बुलेन्स सेवा उपलब्ध गराइने व्यवस्था गरिएको छ। साथै गर्भवती महिलाका लागि निःशुल्क अल्ट्रासाउन्ड सेवा सञ्चालन गरिनेछ। आयुर्वेद तथा परम्परागत चिकित्सा प्रणालीको संरक्षण र विकासका कार्यक्रमसमेत आगामी वर्ष सञ्चालन गरिने नगरपालिकाले जनाएको छ।
कृषि उत्पादन वृद्धि, गुणस्तरीय शिक्षा, सहज स्वास्थ्य सेवा र धार्मिक पर्यटन प्रवर्द्धनलाई एकसाथ जोड्दै मटिहानी नगरपालिकाले आगामी आर्थिक वर्षको बजेटमार्फत समृद्ध र आत्मनिर्भर नगर निर्माणको आधार तयार गर्ने लक्ष्य लिएको छ।
यो विषयमा आफ्नो प्रतिक्रिया दिनुहोस् !