जनकपुरधाम । नेपाल सरकारले भारत–नेपाल सीमाबाट आवतजावत गर्ने सवारी साधनका लागि नयाँ डिजिटल व्यवस्था लागू गर्दै सीमा पार गर्ने प्रक्रिया अत्यन्त सहज बनाएको छ।
भन्सार इन्ट्री पास लिन अब भारतीय सवारी धनीलाई भन्सार कार्यालयमा धाउनुपर्ने समस्या अन्त्य गर्न अनलाईन सेवा शुरू गरेकाे छ । सरकारकाे यस कदमले विशेष गरी भारतीय सवारीधनी र पर्यटकलाई ठूलो राहत दिने अपेक्षा गरिएको छ।
नेपाल सरकारको निर्णयअनुसार अब भारतबाट नेपाल प्रवेश गर्ने सवारी साधनले सीमामा घण्टौं लाइन बस्नुपर्ने झन्झटबाट मुक्ति पाउने भएका छन् ।
यसअघि अनिवार्य रूपमा भन्सार कार्यालयमा लाइन बसेर ‘सवार इन्ट्री भन्सार पास’ लिनुपर्ने बाध्यता थियो। तर अब यो प्रक्रिया पूर्ण रूपमा अनलाइन प्रणालीमार्फत गर्न सकिनेछ ।
बुधबारदेखि औपचारिक रूपमा सुरु गरिएको यस सेवाको उद्घाटन अर्थमन्त्री स्वर्णिम वाग्लेले गरेका छन्। उनका अनुसार यो प्रणालीले पर्यटकको यात्रा सहज बनाउनुका साथै सीमामा हुने भीडभाड र समयको बचत गर्नेछ ।
भन्सार विभागका महानिर्देशक श्याम प्रसाद भण्डारीका अनुसार अब सम्पूर्ण प्रक्रिया डिजिटल, छरितो र पारदर्शी बनाइएको छ। यसले सेवा प्रवाहमा सुधार ल्याउने र अनियमितता घटाउने विश्वास गरिएको छ।
नवीकरण पनि अनलाइनमै
नयाँ व्यवस्थाअनुसार नेपालमा सवारी साधनको बसाइ अवधि सकिएमा कस्टम कार्यालय धाउनु पर्ने छैन। प्रयोगकर्ताले अनलाइनमार्फत नै आफ्नो सवारी पास नवीकरण गर्न सक्नेछन्, जसले समय र खर्च दुवै बचत गर्नेछ।
कसरी गर्ने अनलाइन दर्ता ?
नयाँ प्रणाली प्रयोग गर्न इच्छुक सवारीधनीले तलका चरणहरू पालना गर्नुपर्नेछ :
कस्टम विभागको आधिकारिक वेबसाइट https://nnsw.gov.np/tiv/gen मा जाने
‘हाम्रा सेवाहरू’ (Our Services) सेक्सनमा क्लिक गर्ने
TIV (Temporary Import Vehicle) विकल्प चयन गर्ने
आवश्यक विवरण भरेपछि क्यूआर कोड प्राप्त हुन्छ
सोही क्यूआर कोडमार्फत शुल्क तिरेर दर्ता पूरा गर्न सकिन्छ । सीमामा प्रवेश गर्दा यही क्यूआर कोड देखाएपछि सवारीलाई बिना झन्झट प्रवेश अनुमति दिइनेछ।
यस डिजिटल प्रणालीले नेपाल भित्रिने पर्यटकको संख्या बढाउने, सीमा क्षेत्रमा हुने भीडभाड कम गर्ने र समग्रमा पर्यटन तथा सीमावर्ती व्यापारलाई थप गतिशील बनाउने अपेक्षा गरिएको छ।
यो विषयमा आफ्नो प्रतिक्रिया दिनुहोस् !