जनकपुरधाम । महोत्तरीको मटिहानी नगरपालिका उत्कृष्ट नगरपालिकाको अवार्ड पाउन सफल भएका छन् ।
नेपाल नगरपालिका संघ को ३३औँ वार्षिक उत्सवको अवसरमा मटिहानी नगरपालिकालाई सामाजिक विकास क्षेत्रमा उत्कृष्ट कार्य गरेको भन्दै उत्कृष्ट नगरपालिका अवार्ड प्रदान गरिएको छ ।
काठमाडौँमा बिहीवार आयोजित संघको वार्षिक उत्सव विशेष समारोहमा प्रतिनिधि सभाका सभामुख डोलप्रसाद अर्यालले मटिहानी नगरपालिकाका नगर प्रमुख हरि प्रसाद मण्डललाई उक्त अवार्ड प्रदान गरेका हुन् ।
कार्यक्रममा संघका कार्यकारी निर्देशक कलानिधि देवकोटाले मटिहानी नगरपालिकाले शिक्षा, स्वास्थ्य, महिला सशक्तीकरण, बाल अधिकार संरक्षण तथा सामाजिक समावेशीकरणका क्षेत्रमा प्रभावकारी काम गरेकोले उक्त सम्मान प्रदान गरिएको जानकारी दिएका छन् ।
उनले स्थानीय तहले समुदायमै केन्द्रित सेवा र कार्यक्रम मार्फत उल्लेखनीय उपलब्धि हासिल गरेको उल्लेख गरे । संघले देशभरका महानगरपालिका, उपमहानगरपालिका र नगरपालिका गरी २९३ स्थानीय तहहरूमध्ये विभिन्न पाँच विधामा उत्कृष्ट कार्य गर्ने ७ वटा पालिकाहरूलाई यस वर्ष पुरस्कत गरेको हो ।
त्यसअनुसार सामाजिक विकासतर्फ मटिहानी नगरपालिका पुरस्कृत भएको छ। सहरी योजना तथा पूर्वाधार विकासतर्फ पोखरा महानगरपालिका र बुढानिलकण्ठ नगरपालिका ले पुरस्कार प्राप्त गरेका छन् ।
त्यसैगरी वातावरण, संस्कृति तथा पर्यटन क्षेत्रमा गोदावरी नगरपालिका र इलाम नगरपालिका पुरस्कृत भएका छन् भने स्थानीय आर्थिक विकासतर्फ मन्थली नगरपालिका (रामेछाप) लाई पुरस्कृत गरिएको छ। यसैगरी संस्थागत विकास, सेवा प्रवाह तथा वित्तीय सुशासन तर्फ हलेसी तुवाचुङ नगरपालिका लाई उत्कृष्ट घोषणा गर्दै पुरस्कार प्रदान गरिएको छ ।
कार्यक्रममा विभिन्न स्थानीय तहका जनप्रतिनिधि, सरकारी अधिकारी तथा सरोकारवालाहरूको उल्लेख्य उपस्थिति रहेको थियो । यस प्रकारका पुरस्कारले स्थानीय तहहरूबीच स्वस्थ प्रतिस्पर्धा सिर्जना गर्दै सुशासन, पारदर्शिता र विकासका क्षेत्रमा अझ प्रभावकारी कार्य गर्न प्रेरणा मिल्ने अपेक्षा गरिएको छ ।
यो विषयमा आफ्नो प्रतिक्रिया दिनुहोस् !