जनकपुरधाम, चैत १५ गते । देशमा बदलिंदाे राजनीतिक घटनाक्रमले बढेकाे सुरक्षा चुनौतीकाे दृष्टिगत गर्दै मधेश प्रदेशकाे सुरक्षा व्यवस्थामा उच्च सतर्कता अपनाइएको छ ।
प्रहरी प्रधान कार्यालयको निर्देशनपछि मधेश प्रदेशका सबै जिल्लामा सुरक्षा व्यवस्था कडाइका साथ लागू गरिएको मधेश प्रदेश प्रहरी कार्यालयले जनाएकाे छ ।
पूर्वप्रधानमन्त्री एवं नेकपा एमालेका अध्यक्ष केपी शर्मा ओली र पूर्वगृहमन्त्री एवं कांग्रेस नेता रमेश लेखकको पक्राउसँगै ती दलका नेता कार्यकर्ताहरू प्रदर्शनमा उत्रेपछि सम्भावित आन्दोलन तथा अन्य गतिविधिलाई ध्यानमा राख्दै प्रहरी प्रधान कार्यालयले ‘हाई अलर्ट’मा बस्न जारी गरेको सर्कुलर अनुसार उच्च सतर्कता अपनाइएकाे प्रदेश प्रहरीले जनाएकाे छ ।
प्रदेश प्रहरी कार्यालयका प्रमुख डिआइजी गोविन्द थपलियाले गृह मन्त्रालय र प्रहरी प्रधान कार्यालयको समन्वयमा जारी निर्देशन अनुसार प्रदेशभरि नेपाल प्रहरी र सशस्त्र प्रहरीसहित सम्पूर्ण सुरक्षा निकायमा उच्च सतर्कता अपनाइएकाे हाे ।
प्रमुख थापालियाले भने, ‘हिजाेदेखि उत्पन्न राजनीतिक परिस्थितिले सम्भावित सुरक्षा चुनौतीलाई ध्यानमा राख्दै प्रदेशका ८ वटै जिल्लाका प्रहरी युनिटहरूलाई सक्रिय र सतर्क रहनका साथै निगरानी गर्न निर्देशन दिइ सकिएको छ ।’
उनले थप्दै भने ‘राजनीतिक दलहरूसंग समन्वय भइरहेकाे छ भने उनकाे गतिविधिमा निगरानी बढाइएकाे छ भने, सम्भावित प्रदर्शन र अन्य गतिविधिहरूलाई सूक्ष्म रूपमा निगरानीसहित संवेदनशीलताकाे आधारमा प्रहरी परिचालन गरिएकाे छ ।’
करिब सात महिना अघि भदौ महिनामा भएको ‘जेनजी आन्दोलन’ सम्बन्धी घटनाको छानबिन गर्न गठित जाँचबुझ आयोगको सिफारिसका आधारमा पूर्वप्रधानमन्त्री ओली र तत्कालीन गृहमन्त्री लेखकलाई पक्राउ गरिएपछि देशकाे राजनितीक अवस्थामा ठूलाे तरंग उत्पन्न गरेको हो ।
देशभरसहित मधेश प्रदेशमा समेत एमालेका नेता कार्यकर्ता विरोध प्रदर्शन, जुलुस कार्यक्रम आयाेजना गर्दै सडकमा उत्रिसकेका छन । प्रदेशका राजधानी भएकाले जनकपुरधाममा विशेष सुरक्षा परिचालन गरिएकाे छ ।
प्रमुख डिआईजी थापालियाका अनुसार प्रदेशभर १० हजारभन्दा बढी नेपाल प्रहरीका साथै सशस्त्र प्रहरी समेत आवश्यकता र संवेदनशीलताकाे आधारमा परिचालन गरिएकाे छ भने आवश्यक परे थप जनशक्ति परिचालन गर्न सकिने व्यवस्था पनि मिलाइएको छ ।
यो विषयमा आफ्नो प्रतिक्रिया दिनुहोस् !