जनकपुरधाम, फागुन १७ गते । आसन्न प्रतिनिधि सभा सदस्य निर्वाचनको पूर्वसन्ध्यामा जनता समाजवादी पार्टी (जसपा) नेपालका नेता अशोक कुमार यादवले पार्टी परित्याग गर्दै राष्ट्रिय स्वतन्त्र पार्टी (रास्वपा) मा प्रवेश गरेका छन् ।
यादव जसपा नेपाल धनुषा ३ का प्रचारप्रसार समितिका संयोजक, मुखियापट्टी मुसरनिया गाउँपालिकाका निवर्तमान नगर अध्यक्ष तथा पालिका अध्यक्ष पदका प्रत्यासी समेत रहेका थिए ।
रास्वपाको एक कार्यक्रमबीच उनलाई धनुषा–३ का प्रतिनिधि सभा सदस्य पदका उम्मेदवार मनिष झाले फुलमाला, टीका र दोसल्ला ओढाई पार्टीमा स्वागत गर्दै प्रवेश गराएका छन् ।
सो अवसरमा यादवले देशमा सुशासन, पारदर्शिता र जवाफदेहिताको राजनीतिलाई बलियो बनाउन आफूले रास्वपा रोजेको बताए । उनले स्थानीय तहको विकास, युवा रोजगारी र सेवा प्रवाहमा सुधारलाई आफ्नो प्राथमिकतामा राख्दै आगामी दिनमा सक्रियताका साथ पार्टी संगठन सुदृढीकरणमा जुट्ने प्रतिबद्धता व्यक्त गरे ।
यादवको प्रवेशसँगै धनुषा–३ मा रास्वपाको संगठन थप सशक्त भएको पार्टीका नेताहरूले विश्वास व्यक्त गरेका छन् । यादवको प्रवेशले मुखियापट्टी मुसहरनियाँ क्षेत्रमा मत समीकरण फेरिने आंकलन गरिएको छ । यादव लामो समयदेखि तत्कालिन मधेशी जनअधिकार फोरम नेपालबाटै जसपा नेपालमा लागेका थिए । मधेश आन्दोलनमा उनको अग्रणीय भूमिका रहेको छ ।
यो विषयमा आफ्नो प्रतिक्रिया दिनुहोस् !