जनकपुरधाम, फागुन १४ गते । राष्ट्रिय स्वतन्त्र पार्टी (रास्वपा) का तर्फबाट धनुषा निर्वाचन क्षेत्र नम्बर–३ का प्रतिनिधि सभा उम्मेदवार मनिष झाले चुनावी गतिविधिलाई तीव्र बनाएका छन्।
प्रतिस्पर्धामा अव्वल देखिएका झाले विकास, सुशासन र पारदर्शितालाई केन्द्रमा राख्दै मतदातासँग प्रत्यक्ष संवाद सुरु गरेका छन्। घरदैलो तथा भेटघाट कार्यक्रममार्फत उनले आफ्ना योजनाहरू सार्वजनिक गरिरहेका छन्।
बिहीबार नगराइन नगरपालिका–अकौरामा आयोजित घरदैलो कार्यक्रमका क्रममा उनले खानेपानी, ढल निकास, सडक स्तरोन्नति, बेरोजगारी तथा युवापलायन जस्ता समस्यालाई प्रमुख चुनौतीका रूपमा औंल्याए। ती विषयमा आफू जानकार रहेको र निर्वाचित भए ठोस पहल गर्ने उनको भनाइ थियो।
उनले धनुषा–३ का नागरिक अझै पनि आधारभूत सेवाको अभाव झेलिरहेको उल्लेख गर्दै विकासको गति अपेक्षाअनुसार नदेखिएको बताए। बजेट खर्च भए पनि परिणाममुखी काम नदेखिनु चिन्ताजनक भएको भन्दै पारदर्शिता र जवाफदेहिता सुनिश्चित गर्नुपर्नेमा उनले जोड दिए।
रास्वपाको नेतृत्वमा सरकार गठन भए शिक्षा, स्वास्थ्य, रोजगारी र पूर्वाधार सुधारलाई प्राथमिकतामा राखिने उनले स्पष्ट पारे। पुरानो राजनीतिक अभ्यासले जनअपेक्षा पूरा गर्न नसकेको टिप्पणी गर्दै उनले व्यवहारमा परिवर्तन ल्याउने प्रतिबद्धता व्यक्त गरे।
“हामी नाराभन्दा नतिजामा विश्वास गर्छौं,” उनले भने, “जनताको करबाट उठेको रकम जनताकै हितमा खर्च हुने सुनिश्चितता हाम्रो पहिलो लक्ष्य हो।”
युवा लक्षित रोजगारी सिर्जना, कृषि तथा साना उद्यम प्रवर्द्धन र भ्रष्टाचार नियन्त्रणका लागि कडा नीतिगत कदम चाल्ने विषयलाई पनि उनले आफ्नो मुख्य प्राथमिकतामा राखेका छन्।
यो विषयमा आफ्नो प्रतिक्रिया दिनुहोस् !