जनकपुरधाम, माघ २२ गते । सप्तरी निर्वाचन क्षेत्र नम्बर २ बाट राष्ट्रिय स्वतन्त्र पार्टी (रास्वपा) नेपालका उम्मेदवार अमरकान्त चौधरीलाई विद्यालय भवन निर्माणमा भएको भनिएको भ्रष्टाचार प्रकरणमा अख्तियार दुरुपयोग अनुसन्धान आयोगले बयानका लागि बोलाएको छ।
डाक्नेश्वरी नगरपालिका–५ स्थित श्रीकान्त चन्द्र नमुना माध्यमिक विद्यालयको भवन निर्माण कार्यमा मिलेमतो गरी भ्रष्टाचार गरिएको उजुरी परेपछि आयोगले अनुसन्धान अघि बढाएको हो। सोही क्रममा चौधरीसहित नौ जनालाई आयोगको इटहरीस्थित कार्यालयमा उपस्थित गराउन माघ २० गते नै डाक्नेश्वरी नगरपालिकालाई पत्राचार गरिएको आयोग स्रोतले जनाएको छ। पत्रअनुसार माघ २३ गते बयानका लागि उपस्थित गराउन भनिएको छ।
आयोगको पत्रमा अमरकान्त चौधरी सो विद्यालयको विद्यालय व्यवस्थापन समितिका अध्यक्ष रहेको उल्लेख छ। भवन निर्माण कार्यमा अनियमितता भएको आरोपमा चौधरीसहित अन्य आठ जनालाई पनि बयानका लागि बोलाइएको जनाइएको छ।
यस विषयमा डाक्नेश्वरी नगरपालिकाका नगर प्रमुख रामलखन मलाहले भने अख्तियारबाट आएको यो पहिलो पत्र नभएको बताए। उनका अनुसार विभिन्न शीर्षकमा भ्रष्टाचारसम्बन्धी चारभन्दा बढी पत्र आइसकेका छन्। “हाजिर हुन पटक–पटक आग्रह गर्दा पनि उहाँ अटेर गर्दै आउनुभएको छ,” उनले भने, “व्यक्तिगत रूपमा सम्पर्क गर्न खोज्दा समेत भेट हुन सकेको छैन।”
नगरप्रमुख मलाहका अनुसार विद्यालयका लागि चौधरीका बुवाले दान दिएको जग्गामा नमुना विद्यालय कार्यक्रम अन्तर्गत भवन निर्माण, पुस्तक वितरण, प्रयोगशाला र कम्प्युटर ल्याब स्थापनासहित संघीय सरकारबाट एक करोड रुपैयाँभन्दा बढी बजेट आएको थियो। सोमध्ये ४९ लाख रुपैयाँ अनियमितता गरिएको भन्दै उजुरी परेको उनले बताए।
त्यसैगरी सोही जग्गामा फुटबल खेल मैदान निर्माणको नाममा माटो भराइ गर्दा करिब ९० लाख रुपैयाँ भ्रष्टाचार भएको आरोपसमेत रहेको बुझिएको नगरप्रमुख मलाहले जानकारी दिए। चौधरी अधिकांश समय काठमाडौंमै बस्ने गरेकाले भेट्न कठिन भएको बताउँदै उनले यसपटक प्रशासनको सहयोगमा पालिकाका कर्मचारीमार्फत जसरी पनि बयानका लागि अख्तियारमा उपस्थित गराइने बताए।
पत्रअनुसार बयानका लागि बोलाइएकामध्ये चौधरी विद्यालय व्यवस्थापन समितिका अध्यक्ष हुन्। सदस्यहरूमा सतेन्द्र मण्डल, रुन्जी देवी सादा, कविता सिंह, श्यामाला देवी मण्डल, दुखरण मण्डल र रामसागर मण्डल रहेका छन्। त्यस्तै तत्कालीन प्रधानाध्यापक योगेन्द्र प्रसाद मेहता र तत्कालीन सह–प्रधानाध्यापक सुभाष कुमार साहलाई पनि बयानका लागि बोलाइएको छ।
यो विषयमा आफ्नो प्रतिक्रिया दिनुहोस् !