जनकपुरधाम, पुस २६ गते । आस्था बचत तथा ऋण सहकारी संस्था लिमिटेडको १६ औँ वार्षिक साधारण सभा शनिबार जनकपुरधाममा सम्पन्न भएको छ।
साधारण सभामा संस्थाको आर्थिक अवस्था, वार्षिक प्रगति तथा भावी कार्ययोजनामाथि विस्तृत छलफल गरिएको छ ।
कार्यक्रमका प्रमुख अतिथि गुरुङले सहकारीको महत्वबारे प्रकाश पार्दै वर्तमानका लागि मात्र नभई भविष्य सुरक्षित बनाउन पनि बचत संस्कार अपरिहार्य रहेको बताए ।
“सानो–सानो बचत नै भविष्यको ठूलो सहारा बन्छ,” भन्दै उहाँले सदस्यहरूलाई नियमित बचतको अभ्यास गर्न आग्रह गरे ।
सहकारीले सामूहिक भावना, सहकार्य र आपसी विश्वासलाई मजबुत बनाउने उल्लेख गर्दै उनले आर्थिक सशक्तीकरणमा सहकारीको भूमिका महत्वपूर्ण रहेको धारणा व्यक्त गरे ।
साधारण सभामा अध्यक्ष साहले संस्थाको वार्षिक प्रतिवेदन प्रस्तुत गर्दै सदस्यहरूलाई प्रभावकारी, गुणस्तरीय र सर्वसुलभ वित्तीय तथा गैर–वित्तीय सेवा प्रदान गर्ने उद्देश्यसहित अत्याधुनिक प्रविधिमा आधारित सेवा सञ्चालनमा रहेको जानकारी दिए ।
उनका अनुसार संस्थाले कोर बैंकिङ सिस्टम, एसएमएस बैंकिङ तथा मोबाइल एपमार्फत सदस्यहरूलाई घरमै बसेर विद्युत् तथा खानेपानी महसुल भुक्तानी, मोबाइल रिचार्ज, हवाई टिकट, बैंक फन्ड ट्रान्सफर, खल्ती तथा ई–सेवा वालेट टपअप, क्यूआर स्क्यान लगायत विभिन्न खातासम्बन्धी सेवा उपलब्ध गराउँदै आएको छ।
साथै, दक्ष मानव संसाधन विकास र कर्मचारीको व्यावसायिक क्षमता अभिवृद्धिमार्फत अझ प्रभावकारी सेवा प्रदान गर्न संस्था प्रतिबद्ध रहेको उनले बताए ।
साधारण सभामा प्रस्तुत आय–व्यय विवरणअनुसार २०८०/०८१ आर्थिक वर्षमा संस्थाले २ करोड ९५ लाख ३ सय ४३ रुपैयाँ नाफा आर्जन गरेको थियो। यद्यपि २०८१/०८२ आर्थिक वर्षमा नाफा केही घट्दै २ करोड ४२ लाख ११ हजार ७४१ रुपैयाँमा सीमित भएको जानकारी दिइयो।
हाल संस्थाले जनकपुरधामस्थित प्रधान कार्यालय तथा क्षीरेश्वरनाथ नगरपालिका वडा नं. ५, महेन्द्रनगरस्थित सेवा केन्द्रमार्फत सदस्यहरूलाई सेवा प्रदान गर्दै आएको छ।
कार्यक्रममा विशिष्ट अतिथिका रूपमा सुनिल मल्लिक, मोहम्मद मोतीकर रहमान, अमरचन्द्र अनिल तथा वैष्णवी बचत तथा ऋण सहकारी संस्थाका कार्यकारी अधिकृत जयनाथ मण्डल सहभागी रहनुभएको थियो। साधारण सभामा शेयरधनी सदस्य, कर्मचारी तथा सरोकारवालाहरूको उल्लेखनीय उपस्थिति रहेको थियो ।
यो विषयमा आफ्नो प्रतिक्रिया दिनुहोस् !