जनकपुरधाम, कात्तिक १७ गते । गैर सरकारी संस्थाहरुको प्रयासले पिछडिएको आमनागरिकको जीवनस्तरमा निकै विकास भएको वक्ताहरुले दाबी गरेका छन् । सोमवार जानकी महिला जागरण समाजद्वारा आयोजित सामाजिक परिक्षण कार्यक्रममा बोल्ने वक्ताहरुले यस्तो भनेका हुन् ।
उनीहरुले सरकारको नजरमा नपरेर विकासमा पछाडि पारिएकाहरुका विकासमा गैर सरकारी संघ संस्थाहरुको निकै ठूलो योगदान रहेको बताए । खासगरी दलित, जनजाति, पिछडिएका वर्ग, बालबालिकादेखि किशोरकिशोरीको जीवनस्तर र आयश्रोतसहितको आत्मनिर्भरतामा ठूलो परिवर्तन आएको बताए ।
कार्यक्रमका प्रमुख अतिथि जिल्ला समन्वय समितिका अध्यक्ष राजनन्दन मण्डलले गैर सरकारी संस्थाहरुको योगदानकै कारण घुँघटमा बस्ने महिलाहरु अहिले घर बाहिर निस्किने बोल्न सिकेका छन् । यति मात्र होइन उनीहरुमा बढेको आत्मनिभर्रताले आएको परिवर्तनले रोजगारदेखि राजनीति कार्यक्षेत्रसम्म फड्को मारेका छन् ।
कार्यक्रममा उपस्थित जनकपुरधाम उपमहानगरपालिकाका मेयर मनोज साहले पनि गैर सरकारी संघ संस्थाहरुको योगदान समाजिक विकास तथा मानवजीवनस्तर उकास्नमा निकै ठूलो भूमिका निर्वाह गरेको उदाहरण जानकी महिला जागरण समाजले ल्याएको परिवर्तनले देखिएको बताए । कार्यक्रममा गणेशनाथ चारनाथ नगरपालिकाका मेयर जीतनारायण यादव, कमला नगरपालिकाका मेयर विशेश्वर यादव, शहीद नगरपालिकाका उपमेयर सुनिता सिंह लगायतका वक्ताहरुले पनि आ आफ्ना धारणा राखेका थिए ।
सो कार्यक्रममा सहभागी ती संस्थाको परियोजनामा आबद्ध महिलाहरुले आफूहरुको जीवनमै निकै ठूलो परिवर्तन आज आत्मनिर्भर बन्न सफल भएको बताए । केहीले रोजगारी पाएको त केहीले बोल्न आत्मनिर्भरता जगाएको भन्ने कुरा राखेका थिए ।
जानकी महिला जागरण समाजको धनुषा जिल्लामा जनकपुरधाम उपमहानगरपालिका, सबैला नगरपालिका, कमला नगरपालिका, विदेह नगरपालिका र गणेशमान चारनाथ नगरपालिकासहितका विभिन्न पालिकाहरुमा कार्यक्रमहरु संचालनमा रहेका छ् । धनुषा जिल्ला बाहेक प्रदेशका अन्य जिल्लाहरुमा समेत कार्यक्रम संचालनमा रहेको छ ।
समाजका अध्यक्ष मन्दाकुमारी कर्णले जनाए अनुसार धनुषाका विभिन्न पालिकामा दक्ष युवा, जलवायु मैत्री आर्थिक रुपान्तरण मार्फत महिला सशक्तिकरण, विद्युतिय चुलो परिवर्तन र प्रकृतिमा आधारित स्थानीय कृषि खाद्य प्रणालीका लागि नागरिक समाजको कार्यक्रम लगायतका विभिन्न पांचवटा परियोजना संचालनमा रहेको छ ।
यो विषयमा आफ्नो प्रतिक्रिया दिनुहोस् !