जनकपुरधाम, कात्तिक १४ गते । त्रेतायुगमा भगवान श्रीराम र माता जानकीबीच भएको दिव्य वैवाहिक प्रसङ्गको स्मरणमा हरेक वर्ष जनकपुरधाममा भव्य रूपमा मनाइने श्रीराम–जानकी विवाह पञ्चमी महोत्सव यस वर्ष पनि उल्लासपूर्ण वातावरणमा मनाइने भएको छ । यस वर्षको विवाह पञ्चमी मंसिर ९ गतेका दिन मनाइनेछ भने यसको सप्ताहव्यापी कार्यक्रम तालिका सार्वजनिक गरिएको छ ।
कार्यक्रम तालिका श्री जानकी मन्दिरका महन्थ रामतपेश्वर दास वैष्णवले सार्वजनिक गर्नुभएको हो । उहाँका अनुसार मंसिर ४ गते नगरदर्शन, मंसिर ५ गते फूलबारी लीला, मंसिर ६ गते धनुष यज्ञ, मंसिर ७ गते तिलकोत्सव, मंसिर ८ गते मटकोर, मंसिर ९ गते स्वयंवर तथा विवाह पञ्चमी महोत्सव, र अन्तिम दिन मंसिर १० गते रामकलेवा (जन्ती बिदाइ समारोह) आयोजना गरिनेछ ।
महन्थ वैष्णवका अनुसार, अयोध्याबाट आएका साधुसन्त र जन्तीहरूको सम्मानस्वरूप मंसिर १० गतेको रामकलेवा कार्यक्रममा प्रसाद र कोसेलीसहित बिदाइ गरिनेछ । उहाँले यस वर्षको विवाह पञ्चमीलाई अझ आकर्षक, व्यवस्थित र प्रभावकारी बनाउन प्रचार–प्रसारदेखि सुरक्षा व्यवस्थासम्मको तयारी सुरु भइसकेको जानकारी दिनुभयो ।
महोत्सवका अवसरमा जनकपुरधाममा लाखौँको संख्यामा आउने श्रद्धालु भक्तजन र साधुसन्तका लागि बास, खानेपानी, शौचालय, सुरक्षा र सेवा व्यवस्थापनका तयारी तीव्र रूपमा अगाडि बढाइएका छन् । सुरक्षाका लागि विभिन्न निकायहरूबीच संयुक्त कार्ययोजना अनुसार सादा पोसाकसहितका सुरक्षाकर्मीहरू पनि परिचालन गरिने भएका छन् ।
धार्मिक मान्यताअनुसार, मिथिला नरेश राजा जनकले छोरी सीताको स्वयंवरमा राखेको शिव धनुष भगवान रामले तोड्नुभएको थियो, जसपछि दुबैको दिव्य विवाह सम्पन्न भएको थियो । यही ऐतिहासिक प्रसङ्गको स्मरणमा जनकपुरधाममा प्रत्येक वर्ष यो महोत्सव आयोजना गरिन्छ ।
जनकपुरको रङ्गभूमि मैदानमा आयोजना हुने स्वयंवर तथा वैवाहिक कार्यक्रममा ३३ कोटि देवी–देवताहरूको उपस्थिति रहेको धार्मिक विश्वास रहँदै आएको छ । मिथिलाञ्चलका भक्तजनहरू देवी सीतालाई छोरी र बहिनीका रूपमा सम्मान गर्दै प्रत्येक वर्ष यो पर्वमा हर्ष–उल्लासका साथ सहभागी हुन्छन् । अयोध्याबाट आउने जन्तीको स्वागतदेखि बिहेसम्मको सम्पूर्ण कार्यक्रम जनकपुरधाममा धार्मिक, सांस्कृतिक र आत्मिक एकताको प्रतीकका रूपमा मनाइँदै आएको परम्परा निरन्तर रहँदै आएको छ ।
यो विषयमा आफ्नो प्रतिक्रिया दिनुहोस् !