जनकपुरधाम, असाेज २२ गते । मधेश प्रदेशमा सत्तारूढ गठबन्धन भत्किएसँगै नयाँ सरकार गठनका लागि नेपाली कांग्रेसले नेतृत्वको दाबी पेश गरेको छ ।
नेपाली कांग्रेसका संसदीय दलका नेता कृष्ण प्रसाद यादवको नेतृत्वमा कांग्रेस, नेकपा एमाले र जनमत पार्टीका नेताहरूकाे हस्ताक्षर सहितकाे ५८ सांसदको समर्थन रहेको दाबी गर्दै प्रदेश प्रमुखसमक्ष नयाँ सरकार गठनका लागि निवेदन दिएका छन् ।
सरकार गठनको दाबीसम्बन्धी पत्र तीनै दलका नेताहरूले संयुक्त रूपमा प्रदेश प्रमुखको कार्यालयमा बुझाएका छन् । साे दाबी पत्रमा एमाले संसदीय दलका नेता सरोज कुमार यादव, कांग्रेस संसदिय दलका नेता कृष्ण प्रसाद यादव र जनमत संसदीय दलका नेता महेश प्रसाद यादवकाे हस्ताक्षर रहेकाे छ ।
यसअघि, नेकपा एमालेका संसदीय दलका नेता सरोज यादवले हालका मुख्यमन्त्री सतीश कुमार सिंह नेतृत्वको सरकारलाई दिएको समर्थन फिर्ता लिएको घोषणा गर्दै आफ्नो पार्टीका चारै जना मन्त्रीहरूले राजीनामा दिएको घोषणा गरेका थिए ।
कांग्रेस नेतृत्वमा नयाँ सरकार गठनको दाबी पेश भए पनि, मुख्यमन्त्री सिंहले राजीनामा नदिएसम्म वा विश्वासको मतमा असफल नहुन्जेल प्रदेश प्रमुखले नयाँ सरकार गठनको घोषणा गर्न नपाउने संविधानिक प्रावधान रहेको छ ।
संविधानको धारा १६८ अनुसार, हालका मुख्यमन्त्रीको पद रिक्त नहुँदासम्म अर्को मुख्यमन्त्री नियुक्त गर्न नपाइने व्यवस्था छ । त्यसैले अहिलेको अवस्थामा प्रदेश प्रमुखले मुख्यमन्त्रीको राजीनामा वा विश्वासको मतको परिणाम पर्खनु पर्ने संवैधानिक बाध्यता रहेको छ।
यो विषयमा आफ्नो प्रतिक्रिया दिनुहोस् !