जनकपुरधाम, असाेज १५ गते । अन्य वर्ष जस्तै यसवर्ष पनि जनकपुरधामको प्रसिद्ध शक्तिपीठ माता राजदेवी मन्दिरमा ठुलाे संख्यामन बलिप्रदान भएको छ ।
प्राप्त जानकारी अनुसार यसवर्ष राजदेवी मन्दिरमा १४ हजार ९०३ बोकाको बलि प्रदान गरिएकाे हो । जुन गतवर्षभन्दा १०१ वटा कम छ ।
निशा पूजा सम्पन्न भएलगत्तै राति ८ बजेर ३३ मिनेटदेखि सुरु भएको बलिप्रदानको कार्यक्रम बिहान ३ बजेर ५५ मिनेटसम्म चलेको थियो ।
बलि प्रदानका लागि हजारौंको संख्यामा श्रद्धालु भक्तजनहरु मंगलबार दिउँसैदेखि लाइनमा बसेका थिए । बोकाबलीका लागि यसवर्ष पनि ४ वटा अस्थायी ठेहा राखिएको थियो ।
प्रत्येक ठेहामा १० जनाको समूहमा स्वयंसेवक परिचालित गरि प्रतिमिनेट ४० को संख्यामा बलिप्रदान गरिएको महावीर युवा कमिटीका महासचिव भरत प्रसाद साहले जानकारी दिए ।
बलिप्रदान कार्यक्रमलाई व्यवस्थित बनाउन आयोजक महावीर युवा कमिटीले ५ सयको संख्यामा स्वयंसेवक परिचालन गरेको थियो । बोकाको लाइनसहित डोरी र व्यवस्थापनको लागि समेत प्रतिठेहा १० जना जनशक्ति खटाइएको थियो ।
यो विषयमा आफ्नो प्रतिक्रिया दिनुहोस् !