जनकपुरधाम, असाेज १० गते । महोत्तरी जिल्लाको मटिहानी नगरपालिकाका मेयर हरि प्रसाद मंडलले सेवाग्राहीलाई सहज र पारदर्शी रूपमा सेवा दिन निर्देशन दिएमा छन ।
विजयादशमीकाे अवसरमा नगरपालिकाद्वारा आयाेजित “बडा दशैं, दीपावली तथा छठ पर्वको शुभकामना आदान–प्रदान कार्यक्रम” मेयर मण्डलले नगरभित्रका कर्मचारीहरुलाई सेवाग्राहीमैत्री सेवा प्रवाह गर्न कडाइका साथ निर्देशन दिए ।
उनले हाल देशको परिवर्तित राजनीतिक अवस्थालाई ध्यानमा राख्दै सेवाग्राहीले ल्याएको कामलाई कार्यालय समयमा नियमसम्मत ढंगले तत्कालै सम्पन्न गर्नुपर्ने भने ।
गत भदौ २३ गतेदेखि सुरु भएको जेन-जी आन्दोलन पछि देखिएको नयाँ राजनीतिक परिस्थिति र जनताको चासोलाई सम्बोधन गर्नुपर्ने आवश्यकता रहेकाे भन्दै मेयर मण्डलले कर्मचारीलाई सेवाग्राहीको काममा ढिलासुस्ती, अनावश्यक झन्झट र आर्थिक बोझ सिर्जना नगरी सहज र पारदर्शी ढंगले सेवा प्रवाह गर्न निर्देशन दिए ।
कार्यक्रममा उनले कार्यालय समयमा समयमै उपस्थित हुन, सेवा प्रवाह गर्दा कानुनी प्रक्रिया अवलम्बन गरेर मात्र काम गर्ने तर राजस्व बाहेक कुनै पनि किसिमको रकम असुल नगर्ने र यदि सेवाग्राहीबाट अनावश्यक रकम लिएकाे वा विभिन्न बहानामा दुख दिने गरेकाे पाइएमा त्यस्ता कर्मचारीलाई कानुनी दायरामा ल्याइने चेतावनी समेत दिए ।
मेयर मण्डलले वडाध्यक्षहरुलाई समेत सेवाग्राहीको काममा कुनै पनि किसिमको राजनीतिक वा व्यक्तिगत हस्तक्षेप नगरी निष्पक्ष रुपमा सेवा प्रवाह गर्न निर्देशन दिए ।
उनले पालिकाको काममा विश्वास राख्न सक्ने वातावरण बनाउन सबै जनप्रतिनिधि र कर्मचारीले आ–आफ्नो दायित्व इमान्दारिताका साथ निष्ठापूर्वक निर्वाह गर्नुपर्नेमा जोड दिएका थिए ।
यो विषयमा आफ्नो प्रतिक्रिया दिनुहोस् !