जनकपुरधाम, भदौ २३ गते । डिजिटल प्रविधिमा मधेश प्रदेश सभाका महिला तथा सीमान्तकृत समुदायको प्रतिनिधित्व गर्ने सांसदहरुलाई कृतिम बुद्धिमता (एआई) को तालिम दिइएको छ ।
मधेश प्रदेश सभाको समन्वय र यूएनडिपीको संसद सहयोग परियोजनाको सहयोगमा सिआईसी (सामुदायिक सुधार केन्द्र) द्वारा जनकपुरधाममा सम्पन्न सो तालिममा मधेश प्रदेश सभासँग आबद्ध महिला तथा सीमान्तकृत समुदायको प्रतिनिधित्व गर्ने सांसदहरुको सो तालिममा उल्लेखनीय सहभागिता रहेको थियो ।
तालिममा सहभागी जनप्रतिनिधिहरूलाई एआईको आधारभूत अवधारणा, यसको प्रयोगका सम्भावना, व्यवहारिक अभ्यास तथा भविष्यमा प्रविधिमुखी नेतृत्व विकासका उपायबारे एआई विज्ञ प्रशिक्षक प्रवेश सुवेदीले प्रशिक्षक दिएका हुन् । तालिममा “कृत्रिम बुद्धिमत्ताको आधारभूत परिचय”, “एआईको प्रयोग र अवसरहरू” बारे जानकारी गराउंदै “व्यवहारिक अभ्यास” सहभागी सांसदहरुबीच गराइएको छ ।
सहयोगी संस्था यूएनडिपीका संसद सहयोग परियोजनाका संसदीय मामिला अधिकारी, पीएसपी बिटु बाबु श्रीवास्तवले महिला तथा सीमान्तकृत समुदायका प्रतिनिधित्व गर्ने सांसदहरुको डिजिटल प्रविधि युगमा पहुँच सँगै प्रविधि–मैत्री बनाउन, एआईको प्रयोगले नीतिनिर्माणमा नयाँ दृष्टिकोण विकास गर्नमा मद्दत पुरयाउने उद्देश्यले यो तालिमको आयोजना गरिएको बताए ।
यस्तै आयोजक संस्था सिआईसीका कार्यकारी निर्देशक संजय साहले महिला तथा सीमान्तकृत समुदायको प्रतिनिधित्व गर्ने सांसदहरुको डिजिटल प्रविधिमा सहज पहुँच र प्रविधि–मैत्री नेतृत्व विकासमा यो तालिमले महत्वपूर्ण भूमिका खेल्ने बताए ।
तालिममा सहभागी प्रदेश सांसद ममता मण्डलले यो तालिमबाट धेरै कुरा सिकेको र कानून निर्माणमा नयाँ दृष्टिकोण र रिफ्रेन्स लिनमा सहयोग पुरयाउनेछ । उनले भनिन् एआई डिजिटल प्रविधिको बारेमा त सुनेको थिए । तर कसरी काम गर्छ र यसको महत्व बारे थाहा थिएन । यो तालिममा सहभागी भएपछि धेरै कुरा सिक्न पाएको छु ।
यस्तै अर्का सहभागी सांसद कञ्चन बिच्छाले भनिन् ‘एआईको मद्दतले यतिको हरेक कुरामा सहयोग पुरयाउंछ भन्ने कुरा थाहा थिएन । अब यसको प्रयोग कानून तथा निती निर्माणमा गर्नेछु । यसले बुद्धिमताको विकास सँगै कार्य दक्षमतामा समेत बढोतरी हुनेछ ।
सो तालिममा एआई अन्तर्गतका च्याटजिपीटी, गोर्क र क्लाउडी लगायतका प्लेटफर्म तथा एप्स बारे जानकारी दिदैं यी एप्सहरु कसरी चलाउने र कानून निर्माण तथा अन्य काममा कसरी सहयोग पुरयाउन सक्छ बारे प्रशिक्षक सुवेदीले जानकारी गराएका थिए ।
यो विषयमा आफ्नो प्रतिक्रिया दिनुहोस् !