जनकपुरधाम, भदौ १ गते । दाेषीलाई कारवाहीकाे माग गर्दै जनकपुरधाममा स्थानीय प्रशासनविरूद्ध पत्रकारहरू आन्दाेलनमा उत्रेका छन् ।
पत्रकारमाथि आक्रमण गर्ने वकिलहरूविरुद्ध किटानी जाहेरी दिएपनि अहिलेसम्म कारवाही नगरिएकाले पत्रकारहरू स्थानीय प्रहरी प्रशासन विरूद्ध आन्दाेलनमा उत्रेका हुन ।
आन्दाेलनकाे पहिलाे चरणमा आइतवार जिल्ला प्रशासन कार्यालय धनुषा अगाडि बिहान ११ बजेदेखि १२ बजेसम्म एक घण्टा पत्रकारहरूले धर्ना दिएका छन् ।
आक्रमण गर्ने वकिलहरूलाई कारबाही गर, प्रेस स्वतन्त्रताको रक्षा गर, पत्रकारहरूलाई सुरक्षा देऊ लगायतका नारा लेखिएको प्लेकार्ड सहित पत्रकारहरूले धर्ना बसेका थिए ।
धर्ना कार्यक्रमलाई स्थानीय प्रशासनले कुनै चासाे नलिएपछि तिनीहरूविरूद्ध पत्रकारहरूले चर्काे नाराबाजी समेत गरेका छन् । सथानीय प्रशासन मुर्दाबाद, वकिलकाे दादागिरी बन्द गर, दाेषीलाई प्राेत्साहन हाेइन कारवाही गर, पुर्ण स्वतन्त्रता कायम गर र वकिलकाे दलाली हाेइन कानुनकाे पालना गराउ लगायतका नाराबाजी गरेका थिए ।
गुठी संस्थानबाट महासंघले कानुनी प्रक्रिया पूरा गरि लिजमा लिएको ४ कठ्ठा जग्गा गत साउन २७ गते संरक्षण गर्ने क्रममा नेपाल बार एसोसिएसन जनकपुरका पदाधिकारीसहित वकिलहरूले पत्रकारमाथि आक्रमण गरेका थिए ।
सो क्रममा महासंघ प्रदेश अध्यक्ष बञ्जारा, उपाध्यक्ष ज्योती झा, महासचिव शैलेन्द्र महतो ‘क्रान्ति’, पत्रकार दिवाकर राय, विनिता यादव र अनिल निराला घाइते भएका थिए ।
घटनामा संलग्न पाँच जना वकिलविरुद्ध साउन २८ गते नै जिल्ला प्रहरी कार्यालय धनुषामा जाहेरी दिइए पनि हालसम्म पक्राउ गरेका छैनन् ।
नेपाल पत्रकार महासंघ धनुषा शाखाको अगुवाइमा पत्रकारमाथि आक्रमण गर्ने वकिलहरूलाई तत्काल पक्राउ गर्न माग गर्दै आएका छन् ।
पत्रकारहरूले कानुनी प्रक्रिया पूरा गरि गुठी संस्थानसंग ३ लाख एक हजार रूपैया वार्षिक रकम तिर्ने शर्तमा पत्रकार महासंघ मधेश प्रदेश समितिले भवन निर्माणका लागि लिजमा लिएकाे जग्गा अवैध रूपमा नेपाल बार एशाेसिएसन जनकपुरधामले कब्जा गर्न खाेजेपछि विवाद उत्पन्न भएकाे हाे ।
यो विषयमा आफ्नो प्रतिक्रिया दिनुहोस् !