जनकपुरधाम, साउन १६ गते । खडेरी र सुख्खाका उत्पन्न खानेपानी समस्याको दृष्टिगत गर्दै ऊर्जा, सिँचाइ तथा खानेपानी मन्त्री शेषनारायण यादवले धनुषा जिल्लास्थित केही मरम्मत सम्भार आभावमा बन्द रहेका खानेपानी आयोजनाहरु स्थलगत निरीक्षण गरेका छन् ।
कांग्रेस सह महामन्त्री महेन्द्र यादवकाे पहलमा प्राविधिक सहितकाे मन्त्री यादव नेतृत्वमा गएकाे टोलीले क्षिरेश्वरनाथ नगरपालिका अन्तर्गत महेन्द्रनगर खानेपानी आयोजना र मिथिला नगरपालिका–५ विश्रामपुरस्थित अर्को खानेपानी आयोजनाको स्थलगत निरीक्षण गरेको हो ।
निरीक्षणका क्रममा मन्त्री यादवले मरम्मत सम्भारको अभावका कारण बन्द अवस्थामा रहेका आयोजनालाई यथासिघ्र सञ्चालनमा ल्याउन खानेपानी डिभिजन कार्यालय महोत्तरीलाई निर्देशन दिएका छन् ।
“जनताले खानेपानीको चरम अभाव खेप्नु परिरहेको बेला बन्द रहेका आयोजना तुरुन्त सञ्चालनमा ल्याउनु आवश्यक छ,“ मन्त्री यादवले भने, “बजेट अहिले कार्यान्वयन नभएपनि मन्त्रालयको आन्तरिक श्रोत साधनले मरम्मत सम्भार गरी तत्काल संचालनमा ल्याईमा जनतालाई समयमै पानी खुवाउन प्रयासमा हामी जुटेका छौं ।“
मन्त्री यादवले थप्दै भने, “पानीको अभाव धनुषामा मात्र होइन, सिंगो प्रदेशभरि छ। अहिले सबै ठाउँमा एकैपटक बोरिङ जडान गर्नु सम्भव छैन, न त प्रदेश सरकारसँग त्यसका लागि आवश्यक ठूलो बजेट नै छ । तर पनि मन्त्रालयको स्रोतबाट जहाँ सकिन्छ, त्यहाँ बोरिङ जडान कार्य सुरु गरिसकेका छौं । तत्काल राहतका लागि बन्द अवस्थामा रहेका आयोजना मर्मत गरी सञ्चालनमा ल्याउने प्रक्रिया अघि बढाएका छौं ।”
दुवै खानेपानी आयोजनामा तत्काल पाइपलिंक तथा मरम्मत सम्भार गरे पानी संचालनमा आउने टोलीमा सहभागी प्राविधिक खानेपानी डिभिजन कार्यालय महोत्तरीका प्रमुख संजीव साहले बताएका छन् ।
उनले भने हुन त दुवै आयोजनाको काम पूर्ण रुपमा सम्पन्न गर्न ४/५ करोडको लागत आउने हो । तर तत्काल मरम्मत सम्भार गरी संचालन गर्नेगरी तयारी अघि बढाइने छ ।
उनका अनुसार महेन्द्रनगर खानेपानी आयोजनामा पाइपलिंक, पाइप मरम्मत सम्भार र बक्यौता विद्युत महसूल तिर्नुपर्ने काम रहेको छ भने विश्रामपुरस्थित खानेपानी आयोजनामा पाइप जडान र बोरिङ गरेपछि संचालनमा आउनेछ ।
सो निरिक्षण टोलीमा नेपाली कांग्रेसका सह—महामन्त्री महेन्द्र यादव, अर्थमन्त्री सुनिल यादव, प्रदेश सांसद कुमरकान्त झा, मन्त्रालयका निमित सचिव रामकुमार खंग, नगरपालिकाका जनप्रतिनिधिहरु, कांग्रेस नेता श्याम यादवसहित स्थानीय नेता तथा कार्यकर्ताहरुको सहभागिता रहेको थियो । स्थानीय बासिन्दाहरूले मन्त्रीको निरीक्षणलाई स्वागत गर्दै समस्याको शीघ्र समाधान हुने आशा व्यक्त गरेका छन् ।
मधेश प्रदेशमै खडेरीको असर गहिरिँदै गएको छ, जसले गर्दा विशेषगरी ग्रामीण तथा नगर क्षेत्रमा खानेपानी तथा सिचाईको अभावले समस्या गम्भीर बन्दै गएको छ । अहिले सिचाई आभावले धानको रोपाई हुन सकेको छैन । शहरदेखि गाउँसम्म खानेपानीको चरम आभाव भएको छ ।
यो विषयमा आफ्नो प्रतिक्रिया दिनुहोस् !