जनकपुरधाम, साउन १३ गते । जनकपुरधाममा गएराती अन्धाधुन धारिलो हतियार प्रहार गरी एक जना किशोरीको हत्या गरिएको छ ।
जनकपुरधाम उपमहानगरपालिका ४ कटैया चौरीमा सोमबार राति एक महिला र उनकी किशोरी छोरीमाथि धारिलो हतियारले गरिएको आक्रमणमा एक किशोरीको ज्यान गएको छ भने दुई जना गम्भीर घाइते भएका छन् ।
प्रहरीका अनुसार कटैया चौरीमा सूर्यनन्द चौधरीको घरमा डेरागरी बसिरहेकी ३५ वर्षीया आशा देवी यादव र उनकी १५ वर्षीया छोरी अञ्जली कुमारी यादवमाथि राति साढे ११ बजे खुकुरी प्रहार गरिएको हो । घटनामा संगै बसिरहेकी १४ वर्षीया राधा यादव पनि घाइते भएकी छन् । तीनै जना कोठामा रहेको बेला उनीहरूमाथि धारिलो हतियारले आक्रमण गरिएको थियो ।
प्रहरीले धनुषा जिल्लाको क्षिरेश्वरनाथ नगरपालिका वडा नम्बर ९, इच्छापुर निवासी ३५ वर्षीय रामबाबु साह कलवारले खुकुरी प्रहार गरेको प्रारम्भिक अनुसन्धानमा देखिएको बताएका छन् । साहले पारिवारिक रिसिइबीका कारण आशा बस्दै आएको कोठामा पसेर अन्धाधुन्ध खुकुरी प्रहार गरेको प्रहरीको भनाई छ ।
घटनामा आशाकी छोरी अञ्जली कुमारी यादवको घटनास्थलमै मृत्यु भएको प्रहरीले पुष्टि गरेको छ । घाइते अवस्थाका आशा यादव र राधा यादवलाई तत्कालै उपचारका लागि प्रादेशिक अस्पताल जनकपुरमा भर्ना गरिएको छ ।
प्रहरीले घटनाको अनुसन्धान तीव्र बनाएको जनाएको छ । “खुकुरी प्रहार गर्नेको पहिचान भइसकेको छ, उनी हाल फरार छन्, तर लुक्न सक्ने सम्भावित स्थान पहिचान गरेर खोजी भइरहेको छ,” धनुषाका डिएसपी एवम् प्रवक्ता बरुण बहादुर सिँहले जनाए ।
प्रारम्भिक अनुसन्धानमा रामबाबु साह यसअघि पनि विभिन्न आपराधिक घटनामा संलग्न रहेको पुष्टि भएको प्रहरी स्रोतले जनाएको छ। यसअघि करिब ५ बर्ष अगाडी आफ्नी पहिलो श्रीमतिलाई समेत हत्या गरेको घटनामा उनको संलग्नता रहेको स्थानीयहरु बताउँछन् । तेस्रो बिहे गरेका रामबाबु पुनः यस्ता घटना गरेका छन् ।
यो विषयमा आफ्नो प्रतिक्रिया दिनुहोस् !