जनकपुरधाम, वैशाख १२ गते । ताजा तरकारी, फलफूल र किराना सामाग्रीहरुको होम डिलेभरीको सेवा प्रदान गर्दै आएका राष्ट्रिय कृषि कम्पनी नेपाल लिमिटेडको जनकपुरधाममा प्रादेशिक शाखा कार्यालय उद्घाटन गरिएको छ ।
नेपाल कृषि क्षेत्रलाई रुपान्तर गर्दै देशको आर्थिक मेरुदण्डलाई मजबूत बनाउने उद्देश्यले संचालित ती कम्पनीको शाखाका कार्यालयको मधेश प्रदेशका मुख्यमन्त्री सतिश सिंहले एक कार्यक्रमका बीच शुक्रवार उद्घाटन गरेका हुन् ।
कार्यालय उद्घाटनपछि जनकपुरधाम उद्योग वाणिज्य संघमा आयोजित कार्यक्रममा बोल्दै कार्यक्रमका प्रमुख अतिथि मुख्यमन्त्री सिंहले देशको आर्थिक मेरुदण्ड कृषि नै रहेको हुनाले कृषि क्षेत्रको विकास र संवद्र्धनमा तिनै तहका सरकारले ध्यान दिनुपर्ने आवश्यकता रहेको भने ।
उनले भने मधेश प्रदेश मात्रै देशकै अर्थको मुख्य श्रोत नै कृषि रहेको हुनाले यसमा मात्रै ध्यान पुरयाउन आर्थिक संकटबाट उन्मुक्ति भई देश समृद्धितर्फ धकेलिनेछ । राष्ट्रिय कृषि कम्पनीले चालेको कदम निकै सराहनीय रहेको कारण प्रदेश सरकारले सकेसम्म सहयोग गर्ने प्रतिबद्धता समेत मुख्यमन्त्री सिंहले जनाए ।
‘माटोदेखि सफलतासम्म’ लक्ष्यसहितका अभियान लिएर हिंडेको कृषि कम्पनीले काठमाडौपछि मधेश प्रदेशको राजधानी जनकपुरधाममा पहिलो शाखाका कार्यालय खोलेका हुन् । कम्पनीले राष्ट्रिय कृषि शीत भण्डारण लिमिटेड सहायक कम्पनी स्थापना कार्य अघि बढाउनुका साथै ५ वर्षभित्र क्यानिङ्ग प्लान्ट स्थापना, कृषि पर्यटन रिसोर्ट, किसान सशक्तिकरण कार्यक्रम, ईकमर्स एप लगायतका निर्माण गर्ने क्रम रहेको छ ।
स्वदेशमै रोजगारको अवसर दिने उद्देश्यले स्थापना गरिएको ती कम्पनीले ताजा विषादी मुक्त तरकारी, फलफूल र खाद्यान्नहरुको उत्पादन र विक्रीवितरणका साथै निर्यात, कृषि उपजको क्यानिङ्ग उत्पादन र निर्यात, कृषि पर्यटन, शीतभण्डारण, कृषि बजार संचालन लगायतका कार्यक्रम संचालनमा लागेका छन् । कम्पनीले साना व्यवसायीहरुको लागि ५० हजार र ठूला व्यवसायीका लागि २० लाखसम्मको शेयर लगानीको सीमा तोकेका छन् ।
कम्पनीले कृषि उत्पादनका लागि ५ करोड, कृषि बजारका लागि १० करोड, शीत भण्डारणका लागि १० करोड, मोबाइल ईकमर्स एपका लागि एक करोड, कम्पोष्ट मल च्याउ तथा क्यानिङ्गका लागि १५ करोड, कृषि पर्यटनका लागि ५ करोड र अन्य अनुसन्धान तथा चालु स्थिर पूजीको लगानीको लागि बजेट राखेको छ ।
ती कम्पनीले बागमती, मधेश प्रदेशमा ३/३ वटा, लुम्बिनीमा २ र अन्य प्रदेशमा १/१ वटा कार्यालय खोल्ने लक्ष्य राखेको छ । कृषि उत्पादनको जोखिम न्यूनीकरण गर्न कम्पनीले आधुनिक कृषि प्रविधिको प्रयोग, बाली सीमा र कृषि ऋण तथा आकस्मिक पूर्वाधार विकास लगायतका कार्यक्रम संचालनमा राखेका छन् ।
कम्पनीका अध्यक्ष विशाल हुमागाईको अध्यक्षतामा सम्पन्न उद्घाटन कार्यक्रममा मधेश स्वास्थ्य विज्ञान प्रतिष्ठानका रजिष्टार डा. विनोद यादव, जउवा संघका अध्यक्ष सुरेन्द्र भण्डारी, सोडिन नेपालका अध्यक्ष प्रा. डा. मोहन हुमागाई, कम्पनीका जनकपुरधाम शाखा कार्यालय प्रमुख रविन्द्र पजियार र शेयर धनी देवप्रसाद दुलाल लगायतका व्यक्तिहरुले पनि आ आफ्ना धारणा राखेका थिए ।
यो विषयमा आफ्नो प्रतिक्रिया दिनुहोस् !