जनकपुरधाम, चैत २९ गते । राजावादीहरुको आन्दोलनको क्रममा गएको चैत १५ गते आगो लगाएर हत्या गरिएका पत्रकार सुरेश रजक घटनाको निष्पक्ष गर्न माग नेपाल पत्रकार महासंघ मधेश प्रदेश समिति र जिल्ला शाखाले गरेकाे छ ।
प्रेस स्वतन्त्रता तथा पत्रकार सुरक्षाको सुनिश्चितताका लागि नेपाल पत्रकार महासंघले आन्दोलनलाई थप सशक्त बनाउँदै शुक्रवार राष्ट्रिय मानव अधिकार आयोगको जनकपुरधामस्थित क्षेत्रीय कार्यालयमा ज्ञापनपत्र बुझाएको हो ।
महासंघको केन्द्रीय आह्वानमा मधेश प्रदेश समिति र धनुषा शाखाले संयुक्त रूपमा उक्त ज्ञापनपत्र बुझाउँदै हालै काठमाडौँको तीनकुनेमा पत्रकारमाथि भएको जघन्य घटनाको निष्पक्ष र स्वतन्त्र छानबिन, मृतक परिवार र क्षति पुरयाएका संचार माध्यमहरुको क्षतिपूर्तिको माग ज्ञापनपत्र मार्फत गरेका हुन् ।
गत चैत १५ गते काठमाडौंको तीनकुनेमा भएको हिंसात्मक घटनाले प्रेस तथा अभिव्यक्ति स्वतन्त्रतामाथि गम्भीर आघात पुर्याएको महासंघले जनाएको छ ।
महासंघ मधेश प्रदेश समितिका तर्फबाट सचिव हदिस खुद्दार, सदस्यद्वय नवीन सिंह र नवीन प्रियदर्शी तथा जिल्ला शाखाको तर्फबाट अध्यक्ष पुरण साह लगायतका पदाधिकारीहरुले छुट्टाछुट्टै रुपमा मानवअधिकार अधिकृत कुमारी शरणालाई ज्ञापनपत्र बुझाएको हो ।
तीनकुने घटनापछि नेपाल पत्रकार महासंघले यही चैत १८ गते गृह मन्त्रालयमा ध्यानाकर्षण पत्र बुझाइसकेको स्मरण गराउँदै महासंघले सरकार जिम्मेवार भूमिका नखेलेको आरोप महासंघले लगाएको छ ।
यो विषयमा आफ्नो प्रतिक्रिया दिनुहोस् !