जनकपुरधाम, माघ १४ गते । धार्मिक तथा ऐतिहासिक नगर मधेश प्रदेशको राजधानी जनकपुरधामका मठ मन्दिरको हजाराै विग्घा जग्गा अतिक्रमण भइसकेका छन भने अतिक्रमण जारी रहेकाे छ ।
जसको ज्वलन्त उदाहरण हो जनकपुरधाम वडा नम्बर ८ स्थित ऐतिहासिक मन्दिरहरूमध्येको सिया रघुनाथ सदन मन्दिरको जग्गा, जो अहिले अतिक्रमण गर्ने जारी रहेको छ । अहिले यस मन्दिरको जग्गामाथि अवैधरुपमा खुलेआम भवनहरू निर्माण भइरहेका छन् ।
जनकपुरधाममा सार्वजनिक महत्वको मठमन्दिरका बहुमुल्य जग्गा एकपछि अर्को ठाँउमा अवैधरुपमा खुलेआम निजी भवनहरू निर्माण भईरहेपनि सरोकारवाला निकाय एक अर्कालाई पत्राचारमै सिमित भई जिम्मेवारीबाट पन्छिँदै आएका छन् । तर, निर्माण रोक्न र त्यसमा संलग्नहरूलाई कारबाही गर्न कुनै निकायले अग्रसरता देखाएको छैन ।
जनकपुरधामको रामानन्दचोक भन्दा पश्चिम बिहारकुण्डमा रहेका सो सदनको जग्गामा अवैधरुपमा खुलेआम भवन निर्माण भइरहँदा सरोकारवाला निकायहरू मौन छन् । जग्गा रजिस्ट्रेसन आफ्नो नाममा नरहेको र उपमहानगरपालिकासँग समेत घर निर्माणका लागि कुनै प्रकारको इजाजत प्राप्त नरहेपनि भूमाफियाहरुले धमाधम भवनहरू बनाई रहेको छ ।
जनकपुरधाम उपमहानगरपालिका वडा नम्बर ८ सिट नम्बर १३५४–१७ कित्ता नम्बर ४६, सिट नम्बर १३५४–१६ कित्ता नम्बर १२, सिट नम्बर १३५४–१३ कित्ता नम्बर ३९, सिट नम्बर १३५४–९ किता नम्बर १४ लगायतका एक बिघा १२ कठ्ठा भन्दा बढी सिया रघुनाथ सदनको खेती योग्य जग्गा मासेर घर बनाइँदै छ ।
दोहरो नागरिकता मुद्दामा उत्तराधिकारी महन्त नामदेव शरण थुनामा परेपछि उनको नाममा अहिले अवैध मानिएको मनखपको कागज बनाएर बलजफ्ती भूमाफियाहरुले धमाधम एकपछि अर्को भवन ठडयाइँदै छ ।
सिया रघुनाथ सदन मन्दिरको नियमित पूजापाठ र महन्थ पूजारीको भोजन तथा अतिथिको स्वागत सत्कारका लागि धान गहुँ उब्जाउन कुनै बेला दाताले दिएको यस जग्गाको चलन चल्तीको भाउ १९ करोड रुपैयाँ भन्दा बढी रहेको छ ।
प्रतिधुर ५ लाख भन्दा बढी चलन चल्तीको भाउ रहे पनि भूमाफियाहरुको एक समूहले जग्गा धनीलाई थाहै नदिई झासामा राखेर घर बनाउनेहरूसँग प्रतिधुर साढे एक देखि दुई लाख रुपैयाँ सम्म असुलेको बुझिएको छ ।
मन्दिरकाे जग्गा अतिक्रमण कानुन बमोजिम कारबाहिका लागि महन्थ आनन्द मोहन शरणले दिएको सक्कली उजुरी संघीय सरकारका प्रतिनिधि जिल्ला प्रशासन कार्यालयले उपमहानगरपालिकालाई पठाएको छ ।
महन्थ शरणले उपमाहानगरपालिकाको कार्यालयमा अवैध संरचना बनाइरहेका १७ जनाको विरुद्ध अर्को उजुरी पनि दिएका छन् । तर, सरोकारवालाको मौनताका कारण उल्टै भूमाफियाहरुले महन्थ शरणलाई धाकधम्की दिन थालेपछि बाध्य भएर शरणले सुरक्षाका लागि मन्दिरमा सिसिटी टिभी जडान गरेका छन् ।
मठ मन्दिरको धार्मिक महत्वको जग्गाको खुलेआम अतिक्रमण, अवैधानिक रूपमा खरिद बिक्री र कब्जा गरी घर बनाउने र घेरा बेरा लगाउने प्रवृत्ति रोक्न जरुरी रहेको देखिन्छ ।
यो विषयमा आफ्नो प्रतिक्रिया दिनुहोस् !