जनकपुरधाम, असार ५ गते । महोत्तरीको मटिहानी नगरपालिकाले आगामी आर्थिक वर्ष २०८१÷०८२का लागि ४० करोड २७ लाख ६२ हजारको बजेट ल्याएको छ ।
महिटहानी नगरपालिकाको १३ औँ नगरसभामा नगरप्रमुख हरिप्रसाद मण्डलले आर्थिक वर्ष २०८१/०८२ का लागि ४० करोड बढीको बजेट प्रस्तुत गरेका हुन् । बजेटको श्रोत व्यवस्थापन संघीय र प्रदेश सरकारबाट पाउने अनुदान, आन्तरिक श्रोत र राजश्वलाई आधार मानिएको छ ।
सो बजेटको श्रोत व्यवस्थापन राजस्व बाँडफाँटमा संघ सरकारबाट प्राप्त ८ करोड ७१ लाख, प्रदेश सरकारबाट प्राप्त ३५ लाख, संघीय सरकारको विभिन्न अनुदान गरी ३५ करोड ६१ लाख, प्रदेश सरकारबाट अनुदान १ करोड २६ लाख र आन्तरिक श्रोतबाट ३ करोड ४० लाख रकम रहेको छ ।
आन्तरिक स्रोतहरू भूमिकर÷मालपोत, घरबहाल कर, बहाल बिटौरी कर, सवारीसाधन करसहितका विभिन्न शीर्षकबाट प्राप्त हुने तथा गत आर्थिक वर्षको मौज्दातबाट पूर्ती गरिने छ ।
“सांस्कृतिक शहर, समृद्ध नगर” भन्ने मूल नाराका साथ निती तथा कार्यक्रम ल्याइएको छ । नगरपालिकाले कृषि, शिक्षा र स्वास्थ्यलाई प्राथमिकतामा राखेको छ । मैथिली भाषाको विकास संरक्षण र संवद्र्धनका लागि आधारभूत तहमा कक्षा १ देखि ८ सम्म एक सय पूर्णाकको अतिरिक्त पाठ्यक्रम संचालन गर्ने निती नगरपालिकाले लिएको छ ।
शिक्षातर्फ कक्षा ९ का विद्यार्थीहरुलाई ल्यापटप वितरण, कक्षा ११ का छात्रालाई साइकल, दलित, विपन्न, अपाँग, असहाय र शहीद परिवारका जेहेन्दार विद्यार्थीका लागि ‘नगरप्रमुख छात्रवृति पुरस्कार, नगरको वडा नम्बर २ र ३ मा नयाँ आधारभूत विद्यालय स्थापना गरी संचालन र आगामी आर्थिक वर्षदेखि कम्तिमा ४ वटा विद्यालय अंग्रेजी माध्यममा कक्षा संचालन गरिने नीति नगरपालिकाले लिएको छ र सोही अनुसार बजेट विनियोजन गरिने नगरप्रमुख मण्डलले बताएका छन् ।
यस्तै स्वास्थ्यतर्फ नगरमा आयोजना हुने मेला, महोत्सव, चाडपर्व वडा टोल बस्तीमा संचालन भइरहेको मेयरसँग समुदाय स्वास्थ्य सेवा कार्यक्रमलाई निरन्तरता दिदैं आगामी आर्थिक वर्षदेखि ज्येष्ठ नागरिकको निशुल्क ब्लडप्रेसर र डाईबिटिज चेकजाँच कार्यक्रम गरिनेछ ।
मटिहानी र सिमरदही बर्थिँग सेन्टरका लागि निशुल्क एम्बुलेन्स सेवा, दक्ष जनशक्ति, उपकरण र औषधिसहितको स्वास्थ्य संचालन, तथा गर्भवर्ती महिलाको लागि चेकजाँच सहित निशुल्क अल्ट्रासाउण्डको व्यवस्था लगायतका कार्यक्रम समेत नगरपालिकाले ल्याएको छ ।
यस्तै खानेपानी तथा सरसफाई, पशुपालन, उद्योगतर्फ साना उद्योगको विकास तथा प्रवद्र्धन, सहकारी संस्थाको नितीलाई प्रभावकारी बनाइनुका साथै मटिहानीको धार्मिक, ऐतिहासिक र पर्यटकीय स्थलको विकासको क्षेत्रमा समेत उल्लेख्य कदम उठाइने नगरप्रमुख मण्डल बताए ।
नगरप्रमुख मण्डलको अध्यक्षतामा भएको नगरसभाको उदघाटन सत्रमा मधेसका मुख्यमन्त्री सतिश सिंह, जिल्ला समन्वय समिति धनुषाका सभापति सुमनलाल कर्ण, मटिहानी नगरपालिकाको उपप्रमुख मंजुदेवी साह, महोत्तरीका प्रमुख जिल्ला अधिकारी शिवराम गेलाल लगायतको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !