जनकपुरधाम, वैशाख ३० गते ।माओवादी केन्द्र र एमालेले राजीनामा दिएसंगै जसपा नेपाल नेतृत्वको मधेश सरकार अल्पमतमा परेको छ । सरकार ढल्ने सम्भावनासँगै नयाँ सरकार गठन गर्ने छलफल तिव्र बनेको छ । अब एमाले नेतृत्वको नयाँ सरकार गठन हुने कुरा जोडतोडका साथ उठेको छ ।
माओवादी र एमालेले सरकारबाट समर्थन फिर्ता लिएपछि माओवादीका ९ र एमालेका २५ सांसदको समर्थन फिर्ता हुन जान्छ । यो २ वटै दलको ३४ जना प्रदेश सांसद सरकारबाट समर्थन फिर्ता लिएपछि अब मुख्यमन्त्रीसँग २७ सांसदको समर्थन रहन गएको छ ।
यता ‘गोल्डेन चान्स’ ठान्दै प्रदेश सरकारका सत्तारुढ दलहरू माओवादी र एमालेले नयाँ सरकार निर्माण गर्ने गृहकार्यमा लागेका छन् । सोहीअनुसार कसले सरकारको नेतृत्व लिने भन्ने सवालमा तारन्तार यी दुबै दलहरुबिच आन्तरिक छलफल रहेपनि दुवै दलको नेतृत्वमा अडान भएपछि नेतृत्वमा ठोस सहमति जुटिसकेको छैन ।
एमालेका संसदीय दलका उपनेता दीपेन्द्र ठाकुरले पहिला एमालेको नेतृत्वमा सरकार बनाउने सहमति भएको दाबी गरे । यस्तै माओवादीले पनि एमाले, जनतम, लोसपा, एकीकृत समाजवादीको साथ लिएर नयाँ सरकार बनाउने रणनीतिमा लिएको दाबी गर्दैछन् ।
यता माओवादी र एमालेले लोसपा आफूसँग रहेको दाबी गरेपनि लोसपा मधेश प्रदेशका नेता जितेन्द्र सोनलले लोसपाले अहिलेसम्म सरकारमा जाने – नजानेबारे कुनै टुङ्गो नलगाएको बताएका छन् ।
आइतवार दिउँसो जनकपुरमा एक नेताको निवासमा नयाँ सरकार बनाउने विषयमा नेकपा एमाले, जनमत पार्टी, नेकपा माओवादी केन्द्र र लोकतान्त्रिक समाजवादी पार्टी (लोसपा)का नेताहरूबीच छलफल भएको बुझिएको छ ।
बैठकमा नेकपा एमाले संसदीय दलका नेता सरोजकुमार यादव, सांसद हरिनारायण महतो, जनमत पार्टीका संसदीय दलका नेता महेश यादव, नेकपा माओवादी केन्द्रका सांसद उपेन्द्र महतो, रानी शर्मालगायतका नेताहरू सहभागी थिए । छलफलमा चारै दलले सरकारको नेतृत्वमा दाबी गरे पनि सरकार नेतृत्वको विषयमा कुनै सहमति नभएको लोसपाकी सांसद रानी शर्माले बताइन् ।
नयाँ सरकारमा लोसपा निर्णायक
मधेस प्रदेशमा नयाँ सरकार गठनको छलफल तिव्र भएपनि नयाँ सरकार गठन गर्न सजिलो देखिदैन । किनकी सरकारबाट बाहिरिएका एमाले, माओवादी र जनमत तीनै दलको जोडतोडका साथ दाबी गरेका छन् । तीनै दलको दाबी भएपछि नेतृत्वमा विवाद आउने निश्चित छ ।
मधेश प्रदेश सभामा कुल १०७ सदस्य छन् । सरकार गठन गर्नका लागि ५४ संख्या आवश्यक पर्छ । अंकगणितीय हिसाबले यहाँनेर लोसपा निर्णायक शक्तिको रुपमा देखिएको छ । लोसपा जुन गठबन्धनमा गए त्यसको सरकार बन्ने देखिन्छ । प्रदेशमा सभामुखसहित एमाले २५ सांसदसहित सबैभन्दा ठूलो दल हो । एमाले नेतृत्वमा एमालेको २४ सांसद सहित माओवादीको ९, जनमतको १३ गरी ४६ सांसद हुन्छ । यहाँ लोसपा आएपछि ५५ सांसद हुन्छ । सरकार बनाउन ५४ सांसद आवश्यक पर्छ ।
कांग्रेस र जसपा नेपाल गठबन्धनमा कांग्रेसको २२, जसपा नेपाल हालसम्म रहेका १९, नेकपा एसको ७, अन्य साना दलको ३ गरी ५१ वटा सांसद हुन्छ । यहाँ लोसपा समावेश भएपछि ५९ हुन जान्छ । यसरी हेर्ने हो भने लोसपा नै निर्णयक शक्ति देखिन्छ ।
मेरै नेतृत्वमा सरकार रहन्छ ः मुख्यमन्त्री
जसपा नेपाल नेतृत्वको सरकार अल्पमतमा परेसँगै नयाँ सरकार गठनको प्रक्रियामा दलहरु जुटेपनि ३० दिनसम्म हल्लाउन सक्ने अवस्था छैन । सरकार अल्पमतमा परेपनि विश्वासको मत लिन ३० दिनको समयावधि हुन्छ । त्यसमा असफल भएपछि मात्रै नयाँ सरकार गठनको प्रक्रिया अघि बढनेछ ।
यसैबीच मुख्यमन्त्री सरोजकुमार यादवले पनि ३० दिनसम्म कसैलाई मसँग राजीनामा माग्ने अधिकार छैन र संवैधानिक व्यवस्था पनि नरहेको दाबी गरेका छन् । उनले संचारकर्मीसँग कुरा गर्दै भने सदनमा विश्वासको मत लिएपछि मात्र अल्पमत वा बहुमतको कुरा हुन्छ । समर्थन फिर्ता लिएको ३० दिनसम्म विश्वासको मत लिने अधिकार मसँग छ । म विश्वासको मत लिन्छु । मेरो पक्षमा फेरि पनि बहुमत आउँछ, १५ दिनभित्रै म बहुमतका साथ विश्वासको मत लिन्छु र सरकारको नेतृत्व मेरै हुन्छ ।
शत प्रतिशत म विश्वस्त छु । चौथो पटक समर्थन लिएर मैले सरकारको नेतृत्व गरिरहेको छु । अब पाँचौं पटक पनि विश्वासको मत लिन्छु र म नै मुख्यमन्त्री रहिरहन्छु । किनकी जसपा नेपालको १९ सांसद कतै गएको छैन एकढिक्का भई हामीसँगै छ ।
यो विषयमा आफ्नो प्रतिक्रिया दिनुहोस् !