जनकपुरधाम, फागुन १७ गते । मधेश प्रज्ञा प्रतिष्ठानका पदाधिकारी अहंकारी रहेको आरोप लगाउंदै दलीय लठैत संज्ञा दिइएको छ ।
बिहीवार मधेश प्रज्ञा प्रतिष्ठानको पहिलो वार्षिकोत्सव समारोहलाई सम्बोधन गर्दै कार्यक्रममा उपस्थित त्रिभुवन विश्व विद्यालय केन्द्रीय मैथिली विभागका पूर्व विभागाध्यक्ष परमेश्वर कापरले यस्तो आरोप लगाएका हुन् ।
उनले मधेश प्रज्ञा प्रतिष्ठानको कमजोर हुनुको प्रमुखको कारण राजनीतिक निर्देशनमा संचालनमा भइरहेको र अध्यक्ष अहंकारी रहेको संकेत गर्दै भने पदाधिकारीलाई आफ्नो अहंकार त्यागेर सबैलाई समन्वयमा लिई राजनीतिक निर्देशन छाडेर काम गर्नुपर्छ ।
कार्यक्रममा न्यून उपस्थितिलाई लक्षित गर्दै कापरले भने प्रज्ञा प्रतिष्ठानमा राजनीतिक रुपमा कुनै एक विधाका व्यक्तिलाई नियुक्ति नगरी योग्यता र क्षमताको आधारमा ६ वटै विधाका व्यक्ति पत्रकार, साहित्यकार, संगीतकार भाषाविद्, नाट्यकर्मी र संस्कृतिविद् समेटिएको प्रतिष्ठान निर्माण गर्नुपर्छ तब मात्रै प्रतिष्ठानले आफ्नो लक्ष्य हासिल गर्न सक्छ ।
मम देशको बोध भए मात्रै मधेश सार्थक हुन सक्छ, दलीय स्वार्थ र एकल विधाका व्यक्तिलाई मात्र समेटेर दलीय संस्था बनाएर भाषा, साहित्य, संस्कृति र गीत संगीतको विकास हुन नसक्ने बताउंदै उनले भने मम देश अर्थात मेरो देशको अपनत्व बोध नभएसम्म न त मधेश प्रदेश न मधेशका संघ संस्थाहरु सफल हुन सक्छ ।
कापरले प्रतिष्ठानले एक वर्षमा केही काम गर्न नसकेको औल्याउंदै हरेक विधामा काम गर्न सुझाव दिए । प्रदेशभित्रका सबै भाषा, साहित्य, ललितकला, नाट्यकला, संगीत, पुरातत्व र संस्कृतिको संरक्षण तथा संवद्र्धनमा काम गर्ने उद्देश्यले प्रतिष्ठानको गठन गरिएको हो । तर एक वर्षको अवधिमा कवि गोष्ठी र शास्त्रीय तथा लोकायक गुरुदेव कामतको एकल गायन प्रस्तुति बाहेक कुनै कम गर्न सकेको छैन ।
प्रदेशले अहिलेसम्म आफ्नो भाषा पाउन सकेको छैन । भाषामा रहेका विवाद समाधानका लागि प्रमुख रुपमा सो प्रतिष्ठानको गठन गरिएको हो । तर यस सम्बन्धमा प्रतिष्ठानले केही कामै गर्न नसकेको देखिएको छ । प्रतिष्ठानले प्रकाशन गरेको फागुन महिनाको त्रैमासिक बुलेटिन समेत लोकार्पण गरिएको छ । सो बुलेटिनमा प्रतिष्ठानले गरेका कामका कुनै दस्तावेज राखिएको छैन । २४ पृष्ठको सो पत्रिकामा प्रतिष्ठानका अध्यक्ष कापरीको मात्रै २६ वटा फोटो राखिएको छ । प्रतिष्ठानको परिचय, काम कर्तव्य र लोक संस्कृतिको विकासमा प्रतिष्ठानको भूमिका सम्बन्धी आलेख बाहेक केही राखिएको छैन ।
कार्यक्रममा सहभागीहरुको संख्या निकै कम भएको स्वीकार गर्दै प्रतिष्ठानका अध्यक्ष रामभरोस कापरीले आफूले सबैलाई समेटने गरी निमन्त्रण गरयौं । तर आएन भने यसमा मेरो के गलती । उनले आगामी दिनमा असार मसान्त भित्रै हरेक विधाका व्यक्तिलाई पुरस्कृत गर्ने प्रतिबद्धता जनाए ।
यसैबीच कार्यक्रममा मिथिला पेन्टिङ, मूर्तिकला तथा परम्परागत गीतको संरक्षण तथा प्रवद्र्धनमा विशेष योगदान दिनुभएका तीन जना स्रष्टालाई दोसल्ला ओढाएर सम्मान गरिएको छ । यसरी सम्मानित हुनेहरूमा मिथिला चित्रकलातर्फ जनकपुरधामको वडा नंं ३ का मिथिलेश्वरी देवी कर्ण, मूर्तिकलातर्फ धनुषाको धनौजी गाउँपालिकाका प्रसिद्ध मूर्तिकार योगेन्द्र पण्डित र लोक गायनतर्फ सप्तरीको छिन्नमस्ता गाउँपालिकाको वीरपुरका लोक गायक विष्णु यादव रहेका छन् । कार्यक्रममा मैथिली, थारु, तामाङसहितका जातीको भेषभूषसहितको गीतहरू प्रदर्शन गर्ने गरिएको थियो ।
यो विषयमा आफ्नो प्रतिक्रिया दिनुहोस् !