जनकपुरधाम, माघ १७ गते । राजश्व छली गरेकाे आरोपमा धनुषा प्रहरीले जनकपुरधामस्थित बलराम ज्वेलर्सका संचालक बलराम साह र कालीगढसहित चार जनालाई पक्राउ गरेको छ ।
जिल्ला प्रहरी कार्यालय धनुषाको अनुसार पर्नेहरू साह सहित अरुण ज्वेलर्स उद्योगका संचालक अरुण ठाकुर, सिराहा मिर्चैयास्थित राेशन ज्वेलर्सका कालीगढ अजय साह साेनार र संजय साह रहेकाे छ ।
बिना बिल भरपाईको सुनका गहना (दुईवटा बाला) सहित सोमवार पक्राउ परेका सुनचाँदी कालीगढ अजय साह र संजय साह जनकपुरधामस्थित नमस्कार चोक नजिकबाट गाेप्य सुचनाकाे आधारमा पक्राउ परेको थियो । तिनीहरुले दिएको बयानको आधारमा बुधवार बलराम साह र अरुण ठाकुरलाई सोधपुछका लागि जिप्रकामा बोलाइएकाे बेला पक्राउ गरी व्यवसायीद्वय साह र ठाकुरलाई थप अनुसन्धानका लागि राजश्व अनुसन्धान विभागको कार्यालय पथलैया पठाइएको छ ।
सुनचाँदी व्यवसायी साह र ठाकुरलाई थप अनुसन्धानका लागि पथलैया पठाएपछि जनकपुरधाम स्थित सुनचाँदी व्यवसायीहरु आन्दोलित भएका छन् । उनलाई पथलैया पठाए लगतै व्यसायीहरुले टायर बालेर प्रहरी विरुद्ध प्रदर्शन गर्दै सोनारपट्टी बजार बन्द गराएका छन् । उनीहरुले सुनचाँदी व्यवसायी र कालीगढको रिहाईको माग गर्दै प्रहरी विरुद्ध चर्को नाराबाजी गर्दै प्रदर्शनमा उत्रेका छन् । सुनचाँदी व्यवसायी संघको अगुवाईमा व्यवसायीहरुले गरेको प्रदर्शनले बुधवार दिउंसोदेखि नै सोनारपट्टी बजारको अवस्था तनावग्रस्त बनेको थियो । तनावग्रस्त अवस्था साम्य पार्न व्यापक संख्यामा प्रहरी परिचालन गरिएको थियो ।
बिल बिनाको सुनका गहना सहित पक्राउ परेका कालीगढले आफू बलराम ज्वेलर्स र अरुण ज्वेलर्ससँग कारोबार गर्ने गरेको बयान दिएकाे आधारमा दुवै ज्वेलर्सका संचालकलाई सुन कहाँबाट खरीद गरेर ल्याएको बिल माग गरेपछि उपलब्ध नगराउंदा थप अनुसन्धानका लागि राजश्व अनुसन्धान विभागमा पठाइएको धनुषा प्रहरीका प्रवक्ता रञ्जन अवाले जनाएकाे छ ।
प्रहरी श्राेतका अनुसार कालीगढहरु पक्राउ परेपछि मंगलवार प्रहरीले मुचुल्का हस्ताक्षर गराउन व्यवसायी साह र ठाकुर कहाँ पुगेको थियो । तर तिनीहरुले जिल्लामै आउने भनी मुचुल्कामा सही गर्न मानेनन् । सुनचाँदी व्यवसायी संघ धनुषाको अगुवाईमा दुवै व्यवसायी जिप्रका पुगेका थिए । तर त्यहां बिल प्रहरीले माग्दा कालीगढले बनाएकाे गहनाकाे बील हुंदैन भनी उपलब्ध गराउन सकेन । बुधवार पुनः प्रहरीले थप साेधपुछका बाेलाएकाे क्रममा पक्राउ गरि अनुसन्धानका लागि पथलैया पठायाे ।
सुनचाँदी व्यवसायी संघ धनुषाका अध्यक्ष पवन ठाकुरले सुनका गहना अवैध हाेइन, तिनीहरुकाे प्रक्रियामा त्रुटि भएको हुन सक्ने भनी सुनको गहना राखेर अनुसन्धान गर्न प्रहरीलाई आग्रह हामीले गरेका थियाैं । तर प्रहरीले सानो त्रुटिका कारण अनुसन्धानका लागि पथलैया पठाइदिनु गलत हाे भने ।
यस्तै जनकपुरधाम उद्योग वाणिज्य संघका अध्यक्ष जितेन्द्र महासेठले भने प्रहरीले गलत इन्टेन्शनले व्यापारी साहलाई पक्राउ गरेको बताए । उनले भने, ‘मिर्चैयाबाट व्यापारी साहले सुनका गरगहना ल्याएका थिए । पैसा नदिएकाले बिल दिइएको थिएन् । यो सानो कुरालाई प्रहरीले ठूलो इसु बनायो । सामान्य सुनको गहना बिल फेला नपर्दैमा पक्राउ गर्नु गलत हो ।
यसैबीच सुनचाँदी व्यवसायी संघ धनुषाका अध्यक्ष ठाकुरले पक्राउ परेका सुनचाँदी व्यवसायीसहित कारीगरलाई रिहाई नगरेसम्म पहिलो चरणमा भोलीदेखि सुनचाँदी व्यवयासी संघ र कालीगढ संघको संयुक्त आयोजनामा जिल्लाभरिका सुनचाँदी व्यवसाय बन्द गर्नेछाै भने । दोश्रो चरणमा उद्योग वाणिज्य संघलाई आन्दोलनलाई समर्थन गर्दै सम्पूर्ण वस्तुगत उद्योग व्यवसाय प्रतिष्ठान बन्द गर्न अनुरोध गर्नेछौं । यदि उद्योग वाणिज्य संघले सहयोग नगरे तिनीहरुलाई पनि समस्या हुने चेतावनी दिएका छन् ।
सुनचाँदी व्यवसायी साहसँग थप अवैध सुन सक्ने आशंकामा थप अनुसन्धानका लागि पथलैया पठाएको बुझिएकाे छ । श्रोतका अनुसार त्रिभुवन विमानस्थलबाट ६ क्विन्टल सुन बरामदपछि पटक पटक तस्करीकाे सुन बरामद हुन थालेपछि तेश्रो मुलुकबाट तस्करी गरिएका सुनचाँदी कहाँ कहाँ सप्लाई हुन्छ भन्ने अनुसन्धानका लागि प्रहरी अनुसन्धान ब्यूरोले निगरानी बढाएकाे छ ।
तेश्रो मुलुकबाट तस्करी गरिएका सुन भारत सप्लाई हुने गरेकाे आशंकामा प्रहरीले देशका सीमावर्ती बजारहरूमा निगरानी बढाएको श्रोतको भनाई छ । विगतमा जनकपुरधामबाट समेत सुन तस्करी आराेपमा केही व्यक्ति पक्राउ परेकाे थियाे । पुरानाे घटनाकाे दृष्टिगत गर्दै जनकपुर बजारमा समेत निगरनी बढाइएकाे बुझिएकाे छ ।
यो विषयमा आफ्नो प्रतिक्रिया दिनुहोस् !