जनकपुरधाम, माघ ४ । नेपाल रेडक्रस सोसाइटी धनुषाला जनकपुरधाम उपमहानगरपालिकालाई प्रदान गरेको सुविधायुक्त अत्याधुनिक घुम्ति रक्त संकलन बस गैर आवासीय नेपाली संघ (एनआरनए) हस्तान्तरण गरिएको छ ।
देश बाहिर बस्ने नेपालीहरुको संस्था एनआरएनएले जनकपुरधामलाई प्रदान गरेकाे सो घुम्ति रक्त संकलन बस बिहीवार उपमहानगरपालिका परिसरमा आयोजित एक कार्यक्रमका बीच नेपाल रेडक्रस सोसाइटी धनुषाका अध्यक्ष नरेशप्रसाद सिंहलाई हस्तान्तरण गरिएको हो ।
प्रदेश स्वास्थ्य तथा जनसंख्या मन्त्री विरेन्द्र सिंहको प्रमुख आतिथ्यमा हरेक प्रदेश एक ब्लड बस नारा र हरेक घर एक रक्तदाता उद्देश्य सहित एनआरएनएले जनकपुरधाम उपमहानगरपालिकाको मेयर मनोज साहलाई हस्तान्तरण गरेको थियो । सोही कार्यक्रममै मेयर साहले रेडक्रस धनुषाका अध्यक्ष सिंहलाई हस्तान्तरण गरेको थियो ।
बसमा रक्त संकलन गर्ने आधुनिक आरामदायी बेड, रक्त सुरिक्षत राख्ने फ्रिज र वातानुकुलित वातावरण सहितको सुविधाका साथै बसको छाना माथी आवश्यक परेका बेला लगाउन मिल्ने टेन्ट छानो समेत जडान गरिएको छ ।
कार्यक्रमलाई सम्बोधन गर्दै प्रमुख अतिथि मन्त्री सिंहले प्रदेश सरकारले समेत प्रदेशकै ठूलो रक्त संकलन बैंक स्थापना गर्न लागेकाले अब बिरामीलाई ब्लडकाे समस्या नहुने भन्दै रेडक्रस सोसाइटीसँग पनि समन्वय र सहयाेग गर्न तयार रहेको बताए ।
कार्यक्रममा रेडक्रसका अध्यक्ष सिंहले दातृ निकायबाट संचालित रेडक्रस ब्लड बैंकलाई उपमहानगरपालिका र प्रदेश सरकारसँग आग्रह गरे । उनले प्रदेश सरकारले स्थापना गर्ने भनिएको ब्लड बैंकको करोडौ रुपैया बराबरको अत्याधुनिक मेसिनहरु पांचवर्ष अलपत्र रहेकाले त्यसलाई यथाशिघ्र संचालन र रेडक्रसलाई सहयोग गर्न माग गरे । साथै उनले विपन्न गरीबलाई ब्लडमा लाग्ने शुल्क अन्य पालिकाले सहयोग गर्दै आएकोमा उपमहानगरबाट पनि सहयोगको व्यवस्था मिलाउन मेयर साहलाई आग्रह गरे ।
कार्यक्रमका अध्यक्षता गरेका मेयर साहले जनकपुरधाम स्थित रेडक्रस ब्लड बैंकलाई हरसम्भव सहयोग गर्न तत्पर रहेको प्रतिबद्धता जनाए । उनले आगामी दिनमा उपमहानगरले समेत गरीब विपन्न वर्गलाई सहयोगको व्यवस्था मिलाउने बताए ।
सो अवसरमा एनआरएनएका अध्यक्ष डा. बद्री केसी, उपाध्यक्ष डा. हेमराज शर्मा, महिला उपाध्यक्ष रोजिना प्रधान राय सहितका पदाधिकारीहरुको उपस्थिती थियो । एनआरएनएका अनुसार बागमती, गण्डकी, सुदुरपश्चित र कोशीमा यस्तै भ्यान हस्तान्तरण गरिसकिएको छ भने वाँकी प्रदेशहरुमा पनि छिटै प्रदान गरिने छ ।
यो विषयमा आफ्नो प्रतिक्रिया दिनुहोस् !