उपमहानगरमा मेयर साहको छोराको दादागिरी

जनकपुरधाम, साउन १२ गते । जनकपुरधाम उपमहानगरपालिकामा मेयर मनोज साहका छोरा राज साह र उनका आसेपासेको दादागिरी बढदै गएको छ ।

बिहीवार राति मेयर साहका छोरा राज साहले लेखा शाखामा कम्प्यूटर अपरेटर पदमा कार्यरत सुनिल गुप्ताले चेक किन नबनाएको निहुँमा दुव्र्यवहार गर्दै हातपात गरेका हुन् ।

श्रोतका अनुसार मेयर साहले आफ्ना आफन्त सहितका आसेपासेलाई गत आर्थिक वर्ष २०७९/०८० मा बाँडेको योजना र घरकाे पर्दा तथा हाेटल खर्चकाे केही निजी काममा खर्च भएको रकमको चेक नबनाएको कारण राजले कर्मचारी गुप्तालाई राति करीब ८ बजेको समयमा मेयरको कक्षमा बोलाएर उनी र उनीसँगै दुई जना युवकले चेक किन बनाएको भन्दै दुव्र्यवहार गर्दै हातपात गरेको थियो ।

श्रोतले जनाए अनुसार केही यस्ता योजना थियो जसको मापदण्ड र कानून अनुसार मिल्ने खालका थिएन । राजले चेक किन नबनाएको सोधेपछि कर्मचारी गुप्ता कानून सम्मत नमिल्ने भएकाले चेक प्रिन्ट नगरिएको जवाफ दिएपछि मिल्ने मिलाउने काम मेयरको हो कि तिम्रो, तिम्रो काम हो चेक बनाउने चेक नै बनाउ भनेपछि विवाद उत्पन्न भएको थियो ।

घटना पश्चात शुक्रवार उपमहानगरपालिका कर्मचारीहरु मेयर साहको छोरा राजको दादागिरी विरुद्ध आन्दोलित भएका थिए । उनीहरुले कर्मचारीमाथि हातपात गर्ने मेयरका छोरा राज र उनीसँगै रहेका अन्य दुई जनालाई कारवाही नगरेसम्म कामकाज ठप्प पार्ने चेतावनी दिदै आन्दोलनमा उत्रेका थिए ।

तर घटनाको छानबीनका लागि छानबीन कमिटी गठन गरी र दोषीलाई कारवाही गर्ने मेयर साहको आश्वासपछि उनीहरु आन्दोलन स्थगित गरेका हुन । प्राप्त जानकारी अनुसार घटनाको छानबीनका लागि उपमेयर किशोरी साहको संयोजकत्वमा शुक्रवार नै छानबीन कमिटी समेत गठन भएको छ ।

घटना बारे उपमेयर किशोरी साह र मेयर मनोज साह स्वयंले पुष्टि गरेको छ । उपमेयर किशोरी साहले भने घटना भएको हो । त्यसको छानबीनका लागि मेरै संयोजकत्वमा एक छानबीन कमिटी समेत गठन भएको छ । तर घटनाको यथार्थ के हो छानबीनपछि थाहा हुने बताए ।

मेयर साहले पनि घटनाको पुष्टि सहित नैतिक जिम्मेवारी लिंदै भने हात हालाहाल होइन सामान्य विवाद भएको हो । तपाईको छोराले चेक नबनाएको निहुँमा कर्मचारी गुप्तालाई कुटपिट गरेको हो भन्ने जिज्ञासमा मेयर साहले भने चेक नबनाइएकै कारण विवाद भएको हो यसलाई नाकार्न सकिदैन । तर कर्मचारी गुप्ता पनि दोषी हुन् । उनका कारण समयमै कम्प्यूटरबाट चेक प्रिन्ट नगरेको मिडियाको लागि छुटयाइएको रकम सहित कयौं योजनाको भुक्तानी बाँकी रहन गएको हो ।

जनताका लागि गरिएको विकास निर्माणका लागि समयभन्दा काम सम्पन्न गरिएपनि चेक प्रिन्ट नगरदिंदा मेरो छोरा राज कहाँ गुनासो जाँदा आवेशमा आएर सुनिलसँग सोधपुछ गर्दा अटेरी जवाफ दिएको कारण सामान्य विवाद हुन गएको हो । तर अहिले घटना सामसुम भइसकेको छ ।

यता घटना बारे मेयर र उपमेयरले प्रष्ट पारे पनि पिडित गुप्ताले घटना बारे खुलेर बताउन चाहेकाे छैन । तपाईमाथि मेयरका छाेरा राजले हातपात गरेकाे साेध्दा उनले हाेइन त्यस्ताे केही हाेइन सामान्य विवाद भएकाे भने । के विषयमा विवाद भएकाे बारे उनले छाेडनु त्याे कुरा थाहा छैन भनेर आलटाल गरिदिए । मेयरकाे दबावकाे कारण उनी मिडीया आउन नचाहेकाे बुझिएकाे छ ।