महोत्तरी । महोत्तरीको मटिहानी नगरपालिकाले आगामी आर्थिक वर्ष २०८०/०८१ का लागि ४० करोड ३९ लाखभन्दा बढीको बजेट ल्याएको छ ।
मेयर हरिप्रसाद मण्डलले नगरपालिकाको ११ औ नगरसभामा ४० करोड ३९ लाख ८ हजार १ सय रुपैयाको बजेट प्रस्तुत गरेको हो । उनले वडा समितिहरुको प्रशासनिक तथा साधारण खर्च रकम तीन लाखको दरले २७ लाख विनियोजन गरिएको जानकारी दिएका छन् ।
बस्ती तथा वडास्तरबाट छनौट भई आउने योजना सञ्चालन समेत गरी बड़ा समितिको पुँजीगत खर्चतर्फे ५७ लाखको दरले ५ करोड १३ लाख रुपैया विनियोजन छ भने चालु आर्थिक वर्षमा सम्पन्न हुन नसकेका योजनाहरुलाई समेत आगामी आ.व.मा सम्पन्न गर्न समेत बजेट विनियोजन गरिएको मेयर मण्डलले बताए ।
नगरपालिकाको अगामी आर्थिक वर्ष २०८०/०८१ को नीति कार्यक्रमहरुमा समावेश गरिएका कार्यक्रम तथा योजनाहरु प्राथमिकताका स्थान पाएको छ । निति, तथा कार्यक्रममा कृषि, पर्यटन, शिक्षा स्वास्थ्यजस्ता क्षेत्रलाई मुख्य प्राथमिकतामा राखिएको छ । अगामी तथा कार्यक्रम तथा बजेट प्रस्तुत गर्दै मेयर मण्डलले स्थानीय जनताको जीवनस्तर माथि उकास्न स्थानीय ज्ञान, सीप रक्षमतालाई प्रश्रय दिने नीति अवलम्बन गरिने बताए ।
नगरपालिकाको कार्यहरुमा आर्थिक वर्षको नीति कार्यक्रममा मखान खेतीलाई व्यवसायीकरणमा निरन्तरता किसानलाई पादर्शिता, आर्थिक अनुशासन तथा परिचयपत्र वितरण, लक्ष्मी सागरलाई नमूना पोखरीका रुपमा विकास गर्ने, मटिहानी मठलाई विश्व सम्पदा सूचीमा सूचिकृतको लागि नेपाल सरकारसँग अनुरोध गर्ने जस्ता योजनाहरु राखिएको छ । त्यस्तै सामुदायिक विद्यालयका कक्षा ९ मा अध्ययनरत छात्रालाई ल्यापटप वितरण सामुदायिक विद्यालयका कक्षा ११ मा अध्ययनरत छात्रालाई निशुल्क साइकल वितरण, राम माविमा स्नातक तहसम्मको पढाईका लागि विशेष पहल गर्नुका साथै गर्भवतीको लागि निशुल्क अल्ट्रासाउण्ड सेवा, मटिहानी बजारमा ’वाटर एटिएम सञ्चालनमा लगयातका कार्यक्रमहरु संचालनमा ल्याइनेछ ।
नगर निर्माणको कार्यमा समुदाय, सहकारी, गैरसरकारी तथा निजी क्षेत्र लगायत साझेदार संघसंस्थाहरुको सहकार्य आवश्यक हुने बताउँदै मेयर मण्डलले भने सहभागितामूलक साझेदारीलाई प्रश्रय दिने र बहुलगानीको सम्भावना बढाउने कार्यहरुलाई प्राथमिकता दिइएको छ । आर्थिक सामाजिक र सांस्कृतिक रुपमा पछाडी परेका समुदायहरु समेतलाई मध्यनजर गर्दै नगरबासीको सर्वोपरी हितलाई ध्यानमा राखी नगरको चौतर्फी विकासमा सहयोग पुग्न सक्ने उद्देश्य बजेटको रहेको मेयर मण्डलले बताए ।
बुधवार संघीय सरकारका श्रम, रोजगार तथा सामाजिक सुरक्षा मन्त्री शरतसिंह भण्डारीको प्रमुख आतिथ्यमा आयोजित नगरसभाको उद्घाटन सत्र सम्पन्न भएको थियो । समारोहमा प्रदेश सांसदहरु अभिराम शर्मा, रानी शर्मा तिवारी, जयनुल राईन, रमिता प्रधान, जिल्ला समन्वय समिति महोत्तरीका प्रमुख सुमनलाल कर्ण, महोत्तरीका प्रमुख जिल्ला अधिकारी दिपक पहाडी र नगरउपप्रमुख मजुदेवी साह, नगरसभा सदस्यहरु, विभिन्न राजनीतिक दलका प्रतिनिधिहरु लगायतको उपस्थिती रहेको थियो ।
यो विषयमा आफ्नो प्रतिक्रिया दिनुहोस् !