जनकपुरधाम, भदौ १८ गते । संघीय सरकारको असहयोगकै कारण प्रदेशले आर्थिक विकासमा फड्को मार्न नसकेको मधेश प्रदेशका मुख्यमन्त्री लालबाबु राउतले आरोप लगाएका छन ।
शनिवार जनकपुरधाम उद्योग वाणिज्य संघको ५५ औं साधारण सभा कार्यक्रमलाई सम्बोधन गर्दै प्रमुख अतिथि मुख्यमन्त्री राउतले प्रदेशमा आर्थिक विकासका धेरै सम्भावना भएकोले आफूले प्रयास पनि गरे तर ठाउँ ठाउँमा संघीय सरकारको असहयोगका कारण चाहदा चाहदै काम गर्न सकेनौ भने ।
उनले आर्थिक विकासको प्रमुख आधार हो उद्योग कलकारखाना फस्टाउनु, हामीले त्यसका लागि कानून पनि बनायौं तर संघीय सरकारले लगानीकर्तालाई जग्गा र इजाजत उपलब्ध गराउन पटक पटक आग्रह गर्दा पनि सहयोग गरेन, परिणाम हामीले सोचे जतिको विकास गर्न सकेनौ भने ।
मुख्यमन्त्री राउतले भने हामीले लगानीकर्ता भित्रयाउन उद्योग व्यवस्थापन गर्न सम्बन्धमा विधेयक ल्यायौं, नियमावली पनि बनाऔं । तर ठूलठूला उद्योगका लागि जग्गा आवश्यक भएकोले जग्गाको अधिकार संघमा निहित भएकोले लगानीकर्ताहरुलाई जग्गा उपलब्ध गराउन पटक पटक संघीय सरकारलाई आग्रह गरयौं तर वातावरण बनाई दिएन ।
पछिल्लो पटक २ सय मेगावाटको सोलार प्लान्टका लागि गरिएको प्रयास बारे उनले भने चौधरी ग्रुप र एक क्याण्डिएनसँग सम्झौता गरियौं तर संघीय सरकार मातहतको नेपाल विद्युत प्राद्यिकरणले इजाजत नदिएपछि सो योजना कार्यान्वयनमा आउन नसकी प्रदेश सरकार असफल भयो ।
उनले जनकपुरधामको पर्यटन प्रवद्र्धन गर्नका लागि जनकपुरधाम विकास प्राधिकरण र हरित जनकपुरधाम बनाउनका लागि २५ करोड र जनकपुरधामको पर्यटकीय विकासका लागि ५ करोड रुपैया चालु आर्थिक वर्षमा बजेट विनियोजन गरेको बताउँदै त्यसमा उपमहानगरपालिकालाई अगाडी बढ्न आग्रह गरे ।
मुख्यमन्त्री राउतले मधेश प्रदेश सरकारले प्रदेशको राजधानी जनकपुरधाम बनाएको बताउँदै प्रदेशको राजधानी तथा नाम निर्धारण गर्नका लागि जनकपुरधाम उद्योग वाणिज्य सङ्घको निक्कै सकारात्मक दबाब भएको कारणले सरकारले दुवै कार्यमा सफल भएको भनी प्रशंसा गरे ।
कार्यक्रममा उपस्थित प्रमुख प्रतिपक्ष लोसपाका प्रमुख सचेतक परमेश्वर साहले संघलाई मात्रै दोष दिएर हुँदैन आफूले बनाएको कानून कतिको कार्यान्वयन गर्न सक्यौं मुख्यमन्त्री राउतसँग प्रतिप्रश्न गरे । उनले भने आर्थिक विकासका लागि उद्योग व्यवस्थापन सम्बन्धी ऐन २ वर्ष अघि नै ल्याइयो तर त्यसको कतिको कार्यान्वयन भयो कुनै अतोपतो छैन, यति मात्र होइन प्रदेशको अर्को आर्थिक विकासको आधार पर्यटन विकासका लागि पर्यटन सम्बन्धी विधेयक ल्यायौं जुन अहिलेसम्म प्रदेश सभामा दर्ता भएर थन्किएको छ ।
नेपाल उद्योग वाणिज्य महासङ्घका उपाध्यक्ष दिनेश श्रेष्ठले सरकारले उद्योग स्थापनाका लागि वातावरण दिएको खण्डमा उद्योगीहरू नयाँ उद्योग स्थापनाका लागि तयार रहेको बताउंदै प्रदेश सरकारलाई पहल गरिदिन आग्रह गरे । सो कार्यक्रममा जनकपुरधाम उपहानगरपालिकाका मेयर मनोज साहले प्रदेशका राजधानी जनकपुरधाममा आर्थिक समृद्धिका लागि यहाँ लगानीकर्ताहरुलाई लगानी गर्न वातावरण बनाई दिन प्रदेश सरकारसँग आग्रह गरे ।
जउवा संघका अध्यक्ष जितेन्द्र महासेठको अध्यक्षतामा सम्पन्न सो कार्यक्रममा जनकपुरधाम उद्योग वाणिज्य संघले कोभिड १९ संक्रमणकालिन अवस्थामा अग्रपंक्तिमा रहेर भूमिका निर्वाह गर्ने स्थानीय निजी स्वास्थ्य संस्थाहरु, उद्योग व्यवसायमा महत्वपूर्ण योगदान पुरयाएका उद्योगी व्यवसायीहरुलाई प्रशंसापत्र सहित सम्मान गरिएको थियो ।
यो विषयमा आफ्नो प्रतिक्रिया दिनुहोस् !