जनकपुरधाम, साउन २५ गते । नेपाल पत्रकार महासंघ धनुषाका संस्थापक अध्यक्ष पण्डित सुन्दर झा शास्त्रीको बुधबार २५औँ स्मृति दिवस मनाइएको छ ।
स्वर्गीय पत्रकार शास्त्रीले पत्रकारिता क्षेत्रमा पुर्याएको अतुलनिय योगदानलाई स्मरण गर्दै महासंघ धनुषा शाखाले उनको स्मृति दिवस मनाएको हो ।
साहित्यकार समेत रहेका स्व. पत्रकार शास्त्रीको स्मृति दिवसको अवसरमा उनको व्यक्तित्वको विषयमा वक्ताहरुले आ-आफ्नो धारणा राखेका थिए ।
शास्त्रीले सम्पादन गर्दै आएका मैथिली भाषाको फूलपात पत्रिका मैथिलीको पहिलो पत्रिकाको रुपमा रहेको छ । उनी मैथिली, नेपाली, हिन्दी र अंग्रेजी भाषामा दखल राख्दथे भने मैथिली भाषा तथा साहित्यमा उनले अतुलनीय योगदान पुर्याएका थिए ।
यसअघिको महासंघ धनुषाको कार्य समितिले नवनिर्मित भवनको माथिल्लो तल्लाको नाम सुन्दर झा शास्त्री सभाकक्ष नामाकरण गरेको थियो । निवर्तमान अध्यक्ष अनिल कुमार मिश्रले सभाहललाई सुन्दर झा शास्त्री सभाकक्ष नामाकरण गर्ने प्रस्ताव सर्वसम्मतिले अनुमोदन गरेपछि सो सभाहलको नाम उनको नाममा नामाकरण गरिएको थियो ।
कार्यक्रममा आफ्नो धारणा राख्दै अध्यक्ष मनिका झाले शास्त्रीको नाममा लेखनवृत्ति कोष स्थापना गर्ने घोषणा गरिन ।
अध्यक्ष झाको अध्यक्षतामा सम्पन्न स्मृतिसभामा पत्रकार महासंघ प्रदेश समितिका उपाध्यक्ष ज्योति झा, धनुषा शाखाका निवर्तमान अध्यक्ष अनिल कुमार मिश्र, उपाध्यक्षद्वय अवधेश कामत र नेहा झा, सह-सचिव गोविन्द महतो, कोषाध्यक्ष राजकमल सिंह, प्रेस सेन्टरका मधेस प्रदेश अध्यक्ष किरण कर्ण, मधेसी पत्रकार समाज धनुषाका अध्यक्ष सुभाष कर्णलगायतका पत्रकारहरूको उपस्थिती रहेको थियो ।
यो विषयमा आफ्नो प्रतिक्रिया दिनुहोस् !