जनकपुरधाम, साउन २२ गते । जनकपुरधाम उपमहानगरपालिका विरूद्ध जानकी मन्दिर आसपासका फुटपाथ व्यापारीहरू विरोध प्रदर्शन गरेका छन् ।
नगरप्रमुख मनोजकुमार साहको निर्देशनमा मन्दिर वरिपरि फुटपाथमा बसेका व्यापारीहरूलाई हटाइएपछि ती व्यापारीहरू व्यवस्थापनकाे माग गर्दै आइतबार विरोध प्रदर्शन गरेका हुन् ।
उनीहरुले स्थानीय जनकपुर युथ डेभलपमेन्ट फोर्स र जानकी युथ नेटवर्क नेपालको समन्वयमा गाँस बासकाे आधार देउ मुल नाराका कि त जागिर देउ या व्यापार गर्न अधिकार देउ माग सहित नगरप्रमुख साह विरूद्ध नगर परिक्रमा गर्दै विरोध र्याली निकालेका छन ।
फुटपाथ खाली गरेको एकसाता भन्दा बढि समय भइसकेपनि उपमहानगरले कुनै व्यवस्थापन नगरेको उनीहरूको गुनासो छ । साना तथा खुद्रा पसल थापेर व्यापार गरी जीविकोपार्जन गर्दै आए पनि आफूहरूको समस्याप्रति नगरप्रमुख साह गम्भीर नभएपछि विरोध प्रदर्शनमा उत्रेकाे एक खुद्रा व्यापारीले बताए ।
व्यापारीहरूले मेयर साहले विपन्न तथा गरिब वर्गका लागि वैकल्पिक व्यवस्थापन गर्न नचाहेकाले बाध्य भएर आन्दोलन गरेको उनले बताए । उनले आफूहरूलाई व्यवस्थापन नगरिए चरणबद्ध आन्दोलन गर्ने चेतावनीसमेत दिएका छन् ।
स्थानीय युवा अगुवा सुशील कर्णले सहज र सहमतिमा कुनै पनि बाधा र अवरोध नगरी समाज, स्थानीय सरकार र सरोकारवालाहरूको आग्रहमा फुटपाथमा व्यवसाय गर्नेहरूले मन्दिर वरिपरिको फुटपाथ खाली गरेपनि अहिले आएर उनीहरूको व्यवस्थापन नहुँदा जीविकोपार्जनमा समस्या परेकाेले आन्दोलन बाहेक अर्को कुनै विकल्प नरहेको बताए ।
उनीहरुले धर्म संस्कृतिसँगै जोडिएका सामग्री बेच्ने फुटपाथे व्यापारीहरुको व्यवस्थापन गर्नु यस लोकतान्त्रिक परिवेशमा स्थानीय सरकारकै दायित्व रहेकोले तीन दिनभित्र आफूहरुको समूचित व्यवस्थापन गर्न मागसमेत गरेका छन् ।
साे माग सहित उपमहानगरपालिकाकाे कार्यालयमा ज्ञापन पत्र समेत बुझाएकाे छ ।
यो विषयमा आफ्नो प्रतिक्रिया दिनुहोस् !