जनकपुरधाम, साउन ११ गते । मधेश प्रदेशबाट प्रहरीले गत आर्थिक वर्ष २०७८÷७९ मा स्रोत नखुलेको अढाई करोड भन्दा बढी रकम बरामद गरेको छ ।
प्रदेशको आठवटै जिल्लाको विभिन्न स्थानबाट प्रदेश प्रहरी कार्यालय जनकपुरधामले स्रोत नखुलेको नेपाली २ करोड १८ लाख ६५ हजार ८२० र भारतीय रुपैया २२ लाख ३९ हजार ८ सय (ने.रु. ३५ लाख ८३ हजार ६६०) बरामद गरिएको प्रदेश प्रहरी कार्यालयले जनाएको छ ।
प्रदेश प्रहरी कार्यालयले गत आ.व. को सार्वजनिक गरेको प्रतिवेदन अनुसार एकवर्षमा विभिन्न १४ वटा अवैध वित्तीय कारोवार हुण्डीबाट र विभिन्न स्थानमा चेकजाँचको क्रममा पक्राउ परेका व्यक्तिहरुबाट कुल २ करोड ५४ लाख ४९ हजार ५ सय रुपैया बरामद गरिएको जनाइएको छ ।
४७ करोड बढिको सामान बरामद
प्रहरीले प्रदेशका जिल्लाहरुको विभिन्न स्थानबाट भन्सार छलि गरी चोरी निकासी गरेका ४७ करोड २२ लाख ६७ हजार १९८ मूल्य बराबरका विभिन्न समानाहरु बरामद गरिएको मधेस प्रदेश प्रहरी कार्यालय जनकपुरधामका प्रवक्ता प्रहरी उपरीक्षक तुलबहादुर कार्कीले जानकारी दिएका छन ।
प्रहरीले ६ करोड १७ लाख ८४ हजार ८८२ को किराना सामग्री, १ करोड २० लाख १२ हजार ५६९ को विद्युतीय सामग्री, १८ करोड ९८ लाख १९ हजार ६१७ रुपैयाँ बराबरको सवारी साधन र पार्टपूर्जा तथा १९ करोड ६९ लाख ६३ हजार ३८१ रुपैयाँ बराबरको लत्ताकपडा, फेन्सी सहितका अन्य सामानहरु समेत बरामद गरेको छ ।
प्रदेश प्रहरीले गत आ.व.मा १९ लाख ५९ हजार ८३८ रुपैयाँ बराबरको २८६ ग्राम ७९४ मिलिग्राम सुन र ९५ लाख ९ हजार ७१६ रुपैयाँ बराबरको १०५ किलो ७५३ ग्राम ३०७ मिलिग्राम चाँदी समेत बरामद गरेको छ । प्रहरीले भन्सार चोरी निकासीका घटनामा संलग्न रहेको भन्दै गत वर्ष २४६ जनालाई पक्राउ समेत गरेको जनाइएको छ ।
यो विषयमा आफ्नो प्रतिक्रिया दिनुहोस् !