जनकपुरधाम, असार १३ गते । लोकतान्त्रिक समाजवादी पार्टी नेपालका नेताहरुले जनता समाजवादी पार्टीका अध्यक्ष उपेन्द्र यादवले नै मधेशलाई कमजोर बनाएको आरोप लगाएका छन ।
सोमवार संगठन सुदृढिकरण र स्थानीय निर्वाचनको समीक्षा बारे लोसपा मधेश प्रदेश समिति बसेको बैठकमा नेताहरुले मधेश मुद्दा कमजोर पार्नमा जसपा अध्यक्ष उपेन्द्र यादवको प्रमुख भूमिका रहेको आरोप लगाउंदै आगामी निर्वाचनमा एकीकरण वा गठबन्धनको सम्भावना नरहेको राखेका थिए ।
बैठकमा स्थानीय निर्वाचनको समीक्षा गर्दै लोसपाका मधेस प्रदेश अध्यक्ष जितेन्द्र सोनलले जनता समाजवादी पार्टी नेपालका अध्यक्ष उपेन्द्र यादवले काँग्रेस र कम्युनिष्टसँग मिलेर मधेस केन्द्रित र मधेश मुद्दालाई कमजोर बनाएको आरोप लगाए ।
उनले भने, ‘मधेस आन्दोलनमाथि दमन गरेका कांग्रेस र कम्युनिष्टसँग मिलेर उपेन्द्र यादवको पार्टीले सत्ताका लागि मधेस मुद्दालाई कमजोर बनाउने काम गरयो जसको परिणाम स्थानीय निर्वाचनमा मधेशीलाई भोग्नु परेको छ ।
बैठकमा उनले भने मधेशका मुद्दालाई कमजोर बनाउने को हो भन्ने कुरा जनतामा गएर बुझाउन जरुरी छ । नेता सोनलले मधेस आन्दोलनको मुद्दामाथी कुठाराघात गरेर पटक पटक धोका दिएकाहरुको असली चरित्र जनतालाई देखाउन र मधेसवादका लागि सक्रिय रहन नेता कार्यकर्तालाइ आग्रह समेत गरेका छन् ।
पार्टीका प्रमुख सचेतक समेत रहेका धनुषा जिल्ला अध्यक्ष परमेश्वर साहले बैठकमा स्थानीय निर्वाचनमा पार्टीका उम्मेदवारले पाएको मत र आगामी प्रदेश तथा प्रतिनिधि सभाको निर्वाचनमा अन्य पार्टीसँग चुनावी तालमेल गर्ने लगायतका विषयमाथि गरिएको छलफलको प्रतिवेदन केन्द्रिय कमिटीमा बुझाउने जानकारी दिए । सो बैठकमा प्रदेश सांसद अभिराम शर्मा, रानी शर्मा तिवारी, जानकी शरण साह, जयनुल राइन, प्रदेश सचिव रामबिनोद चौधरी लगायतका नेता कार्यकर्ताहरुको सहभागीता रहेको थियो ।
यो विषयमा आफ्नो प्रतिक्रिया दिनुहोस् !