जनकपुरधाम, जेठ ३१ गते । प्रादेशिक अस्पताल जनकपुरधामका स्वास्थ्यकर्मी र कर्मचारीहरुले सरोकारवाला निकायसँग स्थायी गर्नुपर्ने सहितका विभिन्न माग गरेका छन ।
मंगलवार अस्पताल विकास समिति कर्मचारी युनियनको अगुवाईमा कर्मचारीहरुले मधेश प्रदेशका मुख्यमन्त्री लालबाबु राउत र मधेश स्वास्वास्थ्य विज्ञान प्रतिष्ठानका निमित भ्वाईस काउन्सलर डा. अंकुर साहलाई ६ बुँदे माग सहितका एक ज्ञापन पत्र बुझाएका छन ।
कर्मचारीहरुले वर्षौदेखि करार तथा अस्थायी रुपमा कार्यरत कर्मचारीहरुलाई स्थायी गर्नुपर्ने, नेपाल सरकारबाट भनिएका ९० प्रकारका औषधि निशुल्क वितरण हुनुपर्ने, अवकाश हुने कर्मचारीलाई उपादानको व्यवस्था, बक्यौता रहेका कोभिड १९ को भत्ता उपलब्ध गराउनुपर्ने र अस्पतालको आयविवरण सार्वजनिक गर्नुपर्ने लगायतका माग ज्ञापन पत्र मार्फत गरेका छन ।
ज्ञापन पत्र बुझ्दै मुख्यमन्त्री लालबाबु राउतले आफूलाई ज्ञापन पत्र दिनुभन्दा राम्रो सम्बन्धित सामाजिक विकास मन्त्रालयमा दिदा राम्रो हुन्थ्यो, सम्बन्धित मन्त्रालयसँग यस बारे हामी सोधपुछ गर्नेछौं ।
त्यस्तै ज्ञापन पत्र बुझ्दै मधेश स्वास्थ्य विज्ञान प्रतिष्ठानका निमित भ्वाईस काउन्सलर डा. अंकुर साहले भने हामी एक्लैबाट समाधान गर्न सक्ने माग होइन, सञ्चालक समिति, मन्त्रालय लगायतका निकायसँग छलफल गरेर अघि बढनेछौं ।
अस्पताल विकास समिति कर्मचारी युनियनका अध्यक्ष मोहम्मद सफी अहमद अन्सारीले भने अञ्चलबाट प्रादेशिक र प्रादेशिक बाट अब अस्पताल प्रतिष्ठानमा पुगिसक्यो तर वर्षौदेखि अस्थायी र करार रुपमा कार्यरत कर्मचारी आजसम्म स्थायी हुन सकेका छैन ।
स्थायी नभएको कारण आफूहरुलाई अवकाश पाएपछि न त कुनै पेन्सन र न उपादानको नै व्यवस्था छ । बढुवा समेत हुन नसक्ने अवस्था रहेको कारण जुन पदमा जागिर पाए आजसम्म सोही तहमा काम गर्दै आएको गुनासो उनले गरे । उनीहरुले माग पुरा नभए आफूहरु काम बन्द गरेर आन्दोलनमा उत्रिनेछौ चेतावनी समेत दिएका छन ।
प्रादेशिक अस्पताल जनकपुरधाममा कुल ४ सय ९० कर्मचारी मध्ये ९० जना मात्र नेपाल सरकारका स्थायी कर्मचारी हुन । बाँकी ४ सय जना स्वास्थ्यकर्मी, चिकित्सक, नर्स र कर्मचारी लगायतका अस्थायी र करारमै २५÷३० वर्षदेखि कार्यरत रहेको प्रादेशिक अस्पताल प्रशासन शाखाका फुलबाबु यादवले बताएका छन । उनका अनुसार यसअवधिमा कतिपय कर्मचारी त स्थायी नहुँदै अवकाश समेत प्राप्त गरिसकेका छन ।
स्थायी कर्मचारी नेपाल सरकारबाट काजमा पठाइएका हुन । अस्पतालमा हाल अस्थायी तथा करारमा कार्यरत कर्मचारीहरु विभिन्न पहुँचका आधारमा विकास समिति, तात्कालिन मेडिकल सुपरिडेन्ट, प्रदेश सरकार र प्रतिष्ठानद्वारा भर्ना गरिएका हुन । मेडिकल सुपरिडेन्ट संगै अस्पतालको स्वरुप परिवर्तनको बेलामा पटक पटक तिनीहरु स्थायीको माग गरेपनि हुन सकेन ।
कानूनमा विकास समिति वा मेडिकल सुपरिडेन्टलाई स्थायी गर्न नपाउने व्यवस्था रहेको कारण स्थापनाकालदेखि नै ती अस्पतालका अस्थायी र करार कर्मचारीहरुको भरमा सञ्चालन हुँदै आएको छ ।
यो विषयमा आफ्नो प्रतिक्रिया दिनुहोस् !