जनकपुरधाम । धनुषाको हंसपुर नगरपालिकामा आसन्न स्थानीय तह निर्वाचनका लागि २/२ जना मेयर/उपमेयर सहित ८७ जनाले उम्मेदवारी दर्ता गराएका छन ।
आइतवार मनोयन दर्ताको पहिलो दिन मेयर पदका लागि लोकतान्त्रिक समाजवादी पार्टी (लोसपा) बाट पुनः दोहरयाउन निवर्तमान मेयर रामज्ञान मण्डल र जनमत पार्टीबाट धनेश्वर यादवले उम्मेदवारी दर्ता गराएका छन ।
निर्वाचन अधिकृत कार्यालयका अनुसार मेयर बाहेके दुवै पार्टीबाट एक/एक जना उपमेयरमा उम्मेदवारी दर्ता गराएको छ भने यी बाहेक ८३ जना वडाध्यक्ष तथा सदस्यमा उम्मेदवारी दर्ता गराएका छन ।
उम्मेदवारी दर्ता गराएका मध्ये वडाध्यक्ष र सदस्यमा अधिकांश स्वतन्त्र नै रहेका छन । लोसपाबाट वडा अध्यक्षमाहरु वडा नं. १ मा अरुण कापर, २ मा उदय साह, ३ मा उदय सिंह, ४ मा लक्ष्मण साह, ५ मा शिवशंकर साह, ६ मा जयप्रकाश मण्डल, ७ मा जीवछ मण्डल, ८ मा रामसेवक मण्डल र ९ मा नरेश मण्डल सहितका उम्मेदवारी दर्ता गराएका छन ।
उम्मेदवारी दर्ता पश्चात संचारकर्मीसँग कुरा गर्दै रामज्ञान मण्डलले भने आफूले आफ्नो कार्यकालमा जनताको अपेक्षित सपना र अधुरा रहेका योजनाहरुलाई पुरा गर्न पार्टीको आग्रह र जनताको मांग अनुसार पुनः मेयर पदमा उम्मेदवारी दिएको हुँ ।
उनले भने आफ्नो कार्यकाल निकै संकटपुर्ण बित्यो, साढे ४ वर्षे कार्यकालमा २ वर्ष कोरोनाकाल र एक वर्ष त जनप्रतिनिधि तथा प्रशासकीय अधिकृत विवादमा मै बित्यो । बांकी रहेका डेढ वर्षमा सिमित श्रोत साधनमा धेरै नै विकास निर्माणको कार्य गरयौं, तर जनताको अपेक्षा अनुसार गर्न सकेनौ । अब आगामी कार्यकालमा नयां नीति तथा योजना सहित अधुरो योजना पुरा गर्दै नगरपालिकालाई विकासशील र रोजगारमुखि बनाउनेछु ।
मण्डलले जनताको चाहनामै आफूले लोसपाबाट पुनः मेयरमा उम्मेदवारी दिएको भन्दै आफूले गरेको कार्यको मूल्यांकन गर्दै जनताले आफूलाई नै जिताउने छ भन्ने विश्वास व्यक्त गरे ।
मण्डलले निकै तामझामका साथ उम्मेदवारी दर्ता गराएका थिए । हंसपुर गाउँबाट बाजागाजा सहित विभिन्न गाउँको परिक्रमा गर्दै जनतासँग भोट मांग्दै नगरपालिकाको कार्यालय बघचौडा उम्मेदवारी दर्ता गराउन पुगेका थिए । उनले हजारौ नेता कार्यकर्ता तथा समर्थक सहितको दलबल सहित निर्वाचन अधिकृतको कार्यालय उम्मेदवारीका लागि आएका थिए ।
यो विषयमा आफ्नो प्रतिक्रिया दिनुहोस् !