जनकपुरधाम । देशका अन्य प्रदेश सहित मधेश प्रदेशमा पनि टाइफाईड विरुद्धको २२ दिने खोप अभियान चैत २५ गतेदेखि सञ्चालन हुने भएको छ ।
फोहरजन्य पदार्थबाट सर्ने टाइफाईड न्यूनीकरणका लागि १५ महिनादेखि १५ वर्षसम्मका बालबालिकालाई लक्षित गरी चैत २५ गतेदेखि वैशाख १८ गतेसम्म देशैभरि टाइफाईड विरुद्धको खोप अभियान शुरु हुँदैछ ।
प्रदेश स्वास्थ्य निर्देशनालयले सोमवार जनकपुरधाममा एक पत्रकार सम्मेलन आयोजना गरी अभियान बारे जानकारी दिएका छन । प्रदेशका ८ वटै जिल्लामा १७ लाख ८७ हजार ७ सय १० जना बालबालिकालाई टाइफाईड विरुद्धको खोप दिने लक्ष्य रहेको स्वास्थ निर्देशनालयका निर्देशक विजय झाले जानकारी दिए । उनले भने लक्षित वर्गका कम्तिमा ९५ प्रतिशत खोप लगाउने तयारी रहेको छ । नियमित खोप दादुरा, रुवेलालाई असर नपर्ने नगरी टाइफाइड विरुद्धको खोप सँगै निर्धारित स्वास्थ्य संस्थाहरुमा दिइनेछ ।
लक्षित मध्ये करीब ८० प्रतिशत बालबालिका विद्यालय समूहको रहेकाले विद्यालयलाई प्राथमिकतामा राखेर त्यहाँ खोप सञ्चालन गरिनेछ । त्यो सँगै वडास्तरीय तथा नियमित खोप केन्द्र र स्वास्थ्य संस्थामा पनि खोप अभियान सञ्चालन गरिनेछ । लक्षित बालबालिका नजिकका कुनैपनि निजी तथा सामुदायिक विद्यालयमा गई खोप लगाउन सक्ने गरी व्यवस्थापन गरिएको निर्देशक झाले जानकारी दिए ।
टाइफाइड विरुद्धको खोप अभियान सञ्चालन गर्ने नेपाल साउथ इस्ट एसियाको पहिलो देश रहेको दाबी विश्व स्वास्थ्य संगठनका मधेस प्रदेशका प्रतिनिधि सुरेश शुक्लाले गरे । उनले भने टाइफाईड विरुद्धको खोप भारत लगायतका केही देशले प्रयोग गरेको हो, तर अभियानको रुपमा संचालन गर्ने देश नेपाल मात्रै हो ।
भारतमा निर्मित टीभीसी नामक सो खोप पूर्ण रुपमा सुरक्षित रहेको दाबी गर्दै शुक्लाले भने खोपमै भर नपर्न आग्रह गरे । उनले खोप संगसंगै सरसफाई तथा नियमित रुपमा र दिशा गरिसकेपछि साबून पानीले हात धुने, कुनैपनि खाद्यय वस्तु धोएर खाने, चर्पी सफा राख्ने लगायतका प्रक्रिया अपनाउनु पनि उतिकै जरुरी छ ।
निर्देशक झाले प्रष्टयाउंदै भने दिशाबाट सर्ने रोग मध्ये टाइफाईड पनि एक हो । फिको माध्यम अर्थात दिशा मुख भएर भित्र प्रवेश गर्दा लाग्ने रोग मध्येको टाईफाइड प्रमुख रहेकोले चर्पी सफा राख्नुका साथै दिशा गरिसकेपछि र कुनै वस्तु खानु अघि साबूनपानीले हात धुंदा टाइफाईड मात्रै होइन डाइरिया लगायतका अन्य रोगबाट पनि बच्न सकिन्छ ।
निर्देशनालयका वरिष्ठ स्वास्थ्य प्रशासक श्रवण नायकले टाइफाइड विरुद्धको यो खोप पुर्ण सुरक्षित रहेको अनुसन्धानबाट पुष्टि भइसकेकोले निर्धक्क भएर लगाउन आग्रह गर्दै झाले गर्भवती महिला, पहिला यो खोप लगाइसकेका, इम्युनिटी पावर कमजोर हुने गरी गम्भीर रोगी लगायतकालाई खोप नलगाउन अनुरोध गरे ।
यो विषयमा आफ्नो प्रतिक्रिया दिनुहोस् !