जनकपुरधाम, चैत २० । आउंदो चैत २३ देखि २५ गतेसम्म जनकपुरधाममा तीन दिवसीय साहित्य, कला तथा नाट्य महोत्सव–२०७८ आयोजना हुन लागेको छ ।
मैथिली विकास कोषको आयोजनामा हुने सो तीन दिवसीय महोत्सवमा साहित्य, कला, संस्कृतिको क्षेत्रमा क्रियाशील नेपाल र भारतका एक सयभन्दा बढी स्रष्टा सहभागी रहने जनाइएको छ ।
आयोजक संस्था मैथिली विकास कोषका अध्यक्ष जीवनाथ चौधरीले आइतवार एक पत्रकार सम्मेलन आयोजना गरी महोत्सवको कार्यक्रम बारे जानकारी दिए ।
महोत्सवको उद्घाटन पूर्वप्रधानमन्त्री एवं नेकपा एकीकृत समाजवादी पार्टीका अध्यक्ष माधवकुमार नेपालको प्रमुख आतिथ्यमा र समापन मधेश प्रदेशका मुख्यमन्त्री लालबाबु राउतको आतिथ्यमा हुने जानकारी अध्यक्ष चौधरीले जानकारी दिए ।
उद्घाटन सत्रमा मुख्यमन्त्री सहित राउत, लोसपा अध्यक्ष महन्थ ठाकुर, जसपा अध्यक्ष उपेन्द्र यादव, पूर्व उपप्रधानमन्त्री विमलेन्द्र निधि, माओवादी केन्द्रका गिरिराजमणि पोख्रेल, एमालेका सत्यनारायण मण्डल, तमलोपा अध्यक्ष वृषेशचन्द्र लालसहित अन्य राजनीतिक दलका दोश्रो पुस्ताका नेताहरुको उपस्थिति रहने जनाइएको छ ।
महोत्सवको कार्यक्रमहरु जानकी मन्दिरको प्रांगण र जनकपुरधाम उद्योग वाणिज्यको सभा हलमा हुनेछ । तीन दिवसीय कार्यक्रमको पहिलो दिन शोभायात्रा एवं नगर दर्शन, मिथिला चित्रकला कार्यशाला, स्कूलस्तरीय वक्तृत्वकला प्रतियोगिता, सत्तामा रमेको विद्रोह विषयमा विमर्श, मैथिली साहित्यमा मिथिला मधेश (विमर्श) र सांस्कृतिक कार्यक्रम आयोजना गरिनेछ ।
दोश्रो दिन भाषा, भाषिका र मैथिली (विमर्श, कथा गोष्ठी, पर्यटन विकासक सांस्कृतिक आधार (विमर्श) मैथिली भाषाको तीन वटा नाटक प्रदर्शन, कवि गोष्ठी, पारम्परिक गीत गायन र सांस्कृतिक कार्यक्रमको आयोजना गरिनेछ ।
त्यस्तै अन्तिम तेश्रो दिन मातृभाषापर लगाम, मैथिली साहित्यमा वैचारिक चेत, समाज परिवर्तनमा युवाको भूमिका, शून्य सिनेमा, पञ्चागामी रंगमञ्च विषयमा विमर्श, नेपाली भाषाको ढल्केको सालैजो र एच सिस्टर नाटक मंचन सहित सांस्कृतिक कार्यक्रम गरी समापन हुनेछ ।
यो विषयमा आफ्नो प्रतिक्रिया दिनुहोस् !