जनकपुरधाम । महोत्तरीको पिपरा गाउँपालिकामा ५ राजनीतिक दलले विभिन्न माग राख्दै आन्दोलन गरिरहेका कारण गाउँपालिकाको सम्पूर्ण कामकाज ठप्प भएको छ ।
सर्वदलीय संयुक्त अन्दोलन परिचालन समिति बनाएर ५ राजनीतिक दलले विभिन्न माग राख्दै गाउँपालिका कार्यालयको प्रशासनिक भवन सहितका शाखाहरूमा गत दुई दिनदेखि तालाबन्दी गरेका छन् । तालाबन्दीका कारण सम्पूर्ण काम ठप्प भएपछि सेवाग्राही मारमा परेका छन् । समितिले गाउँपालिका कार्यालयको मुल गेटमा एक सातादेखि धर्ना दिँदै आईरहेको छ ।
पिपरा गाउँपालिकाको कार्यालयमा अध्यक्ष विक्रम चौधरीले विभिन्न योजनामा अनियमितता गरेको आरोप लगाउँदै सर्वदलीय संयुक्त आन्दोलन परिचालन समितिले गाउँपालिका कार्यालयमा तालाबन्दी गरेको हो । गाउँपालिकाको कार्यालयमा सूचनाको हक, सुशासन र पारदर्शिता कायम गर्नका लागि समितिमा लागेका दल मिलेर तालाबन्दी गरेको पिपरा गाउँपालिका वडा नम्बर ४ का वडाअध्यक्ष अरुण ठाकुरले जानकारी दिए ।
गाउँपालिका अध्यक्ष विक्रम चौधरीले एउटा पनि कानून निर्माण नगरी असक्षमता प्रदर्शन गरेको उनको आरोप थियो । उनले अध्यक्ष चौधरीले स्थानीय कानून नबनाउनु, प्रदेश र संघीय कानूनको कार्यान्वयन र परिपालन नगराउनु, सुशासन कायम नगर्नु, पारदर्शिता नदेखाउनु, भ्रष्टाचारलाई बढावा दिने, आफ्नो आसेपासेलाई गाउँपालिकामा जागिर दिने लगायतको कार्यलाई बढावा दिएको आरोप लगाए ।
उता गाउँपालिकाका अध्यक्ष विक्रम चौधरीले सर्वदलीय समितिले लगाएको सम्पूर्ण आरोप निराधार र तर्कहिन रहेको बताउँदै यो आन्दोलन राजनीतिक स्वार्थ पुर्तीका लागि भईरहेको दावी गरे ।
राजनीतिक स्वार्थपुर्तीका लागि पालिकाको काम प्रभावित गरेर स्थानीयलाई थप पीडा दिनु कहाँको न्याय हो अध्यक्ष चौधरीले प्रश्न गरे ।
अध्यक्ष चौधरीले भने, ‘म संग बहुमत छैन, सबैलाई देखाएर, मिलाएर पारदर्शी ढंगले आफै काम गर्दै आईरहेको छु ।’ आन्दोलन गरिरहेका साथीहरु यो समस्या समाधान गर्नका लागि न वार्तामा बस्न चाह्नु हुन्छ, न कार्यालयमा काम गर्न दिएको अध्यक्ष चौधरीको आरोप छ । उनले आफुले कुनै पनि किसिमको अनियमितता गरेको छु भने अख्तियार सहित १६ वटा निकायमा उजुरी दिएका यदि म गलत साबित हुन्छु भने कारवाही हुन्छ नै भने ।
आन्दोलनकारीहरुले कार्यालयको स्वास्थ्य शाखामा समेत तालाबन्दी गरेपछि वुस्टर डोज लगाउने कार्य समेत प्रभावित भईरहेको बताउँदै अध्यक्ष चौधरीले स्वास्थ्य जस्तो सम्वेदन सम्वेदनशिल क्षेलाई समेत साथीहरुले छोडेका छैनन् । उनले कार्यालय निर्वाधरुपमा संचालन गर्न दिनका लागि अनुरोध समेत गरे ।
अध्यक्ष चौधरीले आफूले गरेका सम्पूर्ण योजना तथा गाउँसभाको निर्णय पारदर्शी गर्न तयार रहेको प्रतिवद्धता व्यक्त गरे । उनले भने आन्दाेलनमा साथीहरूले नै विभिन्न याेजना काम गरेका छन यदि भ्रष्टाचार भएकाे छ भने तिनीहरू नै दाेषी हाे, अहिले आएर याेजना नदिंदा असन्तुष्ट भएर आन्दाेलनमा उत्रेका हुन ।
आन्दाेलनकारीहरूले प्रशासनिक भवन मरम्मत सम्भारमा अढाई कराेड, पत्रपत्रिका सुचनामा ९१ लाख र ईन्धनमा ४७ लाख खर्च, गरेकाे आराेप लगाउंदै आएकाे छ । सर्वदलीय समितिमा नेपाली काँग्रेस, नेकपा माओवादी केन्द्र, जनता समाजवादी पार्टी नेपाल, लोसपा नेपाल, जनमत पार्टी छन् भने गाउँपालिकाको अध्यक्ष एमालेका हुन् ।
आन्दोलनकारीहरुले गाउँपालिका अध्यक्ष चौधरी, प्रमुख प्रशासकीय अधिकृत नागेन्द्र प्रसाद यादव र अख्तियार दुरुपयोग अनुसन्धान आयोगका प्रमुखको पुतला आइतबार जलाएका थिए ।
यो विषयमा आफ्नो प्रतिक्रिया दिनुहोस् !