जनकपुरधाम । डा. सिके राउत नेतृत्वको जनमत पार्टीका कार्यकर्ताहरुले जनकपुरधाम स्थित खानेपानी तथा ढल व्यवस्थापन आयोजनाका प्रमुखलाई दुव्र्यवहार गरेदेखअहिलेसम्म साे कार्यालय प्रमुखविहिन रहेकाे छ ।
खानेपानी तथा ढल व्यवस्थापन आयोजनाका निमित प्रमुख राजेश्वर कुशवाहालाई दुव्र्यवहार भएको घटना पश्चात तीन महिनादेखि कार्यालय प्रमुखको आभाव भई आर्थिक र प्रशासनिक देखि आयोजनाहरुको सम्पूर्ण कामकाज ठप्प रहेको छ ।
कार्यालय प्रमुख विहिन भएको कारण सो कार्यालयमा चालु आयोजनाका सम्पूर्ण कामकाज ठप्प हुनुका साथै कर्मचारीहरु तीन महिनादेखि तलब भत्ता खान पाएको छैन भने गाडी चढनका साथै पानी खान समेत समस्या भएको छ ।
आयोजनाका सिनियर ईन्जिनीयर गंगा प्रसाद महतोले भने कार्यालय प्रमुख नहुँदा आयोजनाको कार्य मात्रै ठप्प भएको छैन आफूहरुको तलब भत्ता रोकिनुका साथै पानी खान र गाडी चढन समेत समस्या भएको छ ।
उनका अनुसार चालु आर्थिक वर्षमा करीब दुई दर्जन चालु आयोजनाको कामका साथै सम्पूर्ण आर्थिक कारोबार ठप्प हुन गएको छ । सिके राउतका कार्यकर्ताहरुले कार्यालयमा रहेको चारपांग्रे गाडीको रिमोट सहित गाडीमा तोडफोड गर्दा मरम्मत सम्भार हुन नसकेको कारण गाडी चढन पनि समस्या भएको छ ।
आयोजनाका अर्का इन्जियर पुष्पराज सिंहले भने आयोजनाका ठेकेदारहरु दिनहुँ नयाँ कामको सम्झौता, बक्यौता भुक्तानी र चालु आयोजनाको काम सुचारु गर्न धाइरहेका छन् । लामो समयदेखि प्रमुख नहुँदा आयोजनाको दिन बाँकी रहेको भुक्तानी रकम, योजना संचालनको लागि दिनुपर्ने पेश्की रकम, नयाँ योजना सम्झौता, मर्मत संभारका योजना, कार्यालयमा कार्यरत कर्मचारीको तलव भक्ता लगायतका कार्यहरु रोकिएकोले निकै समस्या भएको छ ।
उनले भने तिहार जस्ता पर्वमा आफूहरुले तलब पाउन सकेनौ निकै नै विजोग भएको छ, कार्यालय जान गाडीमा आफ्नै पैसा ईन्धन हाल्नु परिरहेको छ भने पानी समेत घरबाटै लिएर खानुपर्ने अवस्था रहेको छ ।
सिनियर ईन्जिनीयर महतोले भने कार्यालय प्रमुख नहुँदा संचालित आयोजनाको काम र आर्थिक कारोबार ठप्प भएको बिषयमा पटक–पटक सम्वन्धीत विभाग र मन्त्रालयमा जानकारी गराउँदा समेत अहिलेसम्म कुनै पनि प्रमुख पठाएको छैन् । विभाग र मन्त्रालयलाई लिखित तथा मौखिक रुपमा जानकारीका साथै आफै गएर कयौं पटक ताकेता गर्दा पनि कुनै चासो नलिइएको गुनासो उनले गरे ।
गएको कात्तिक ४ गतेका दिन सिके राउत नेतृत्वको कार्यकर्ताहरुले आफ्ना अध्यक्षको घर जाने बाटोमा बाटो निर्माण नगरेको निहुँमा निमित प्रमुख कुशवाहालाई कार्यालयमा दुव्र्यवहार गर्नुका साथै अर्धनग्न गरी जनकपुरधाम बजार क्षेत्रमा नगरपरिक्रमा गराएको थियो ।
कर्मचारी श्रोतका अनुसार निमित प्रमुख कुशवाहासँग भएको दुव्र्यवहार घटना पश्चात मन्त्रालयमा ताकेता गर्दा पनि यहाँ कुनैपनि कर्मचारी प्रमुखको रुपमा आउन मानिरहेका छैनन ।
मन्त्रालयका प्रवक्ता एवं सहसचिव ज्ञानप्रसाद ढकालले आयोजना कार्यालयको समस्याबारे आफूहरुलाई जानकारी भएको र समाधानका लागि चाँडै नै हामी कुनै व्यवस्था गर्ने बताए। सिके राउतका कार्यकर्ताले पछिल्लोपटक कार्यालय प्रमुखलाई गरेको दुव्र्यवहार घटनाले नै गर्दा कर्मचारी आउन नमानेको उनले स्वीकार गरे। @ Ekagaj
यो विषयमा आफ्नो प्रतिक्रिया दिनुहोस् !