जनकपुरधाम । प्रदेश २ मा बढदै गएको कोरोना संक्रमितलाई दृष्टिगत गर्दै सर्तकता अपनाउन आग्रह गरिएको छ ।
पछिल्लो दुई सातामा प्रदेशमा झण्डै दोब्बरले कोरोना संक्रमितको संख्या बढेको छ । बढदै गएका संक्रमितहरुमध्ये अधिकांश धनुषाकै रहेको स्वास्थ्य निर्देशनालय प्रदेश २ ले जनाएको छ ।
स्वास्थ्य निर्देशनालयका प्रमुख विजय झाले कोरोना संक्रमितहरुको संख्या क्रमिक रुपमा बढदै गएकोले सतर्कता अपनाउन जरुरी रहेको भनेको छ । उनले भने केही महिनाअघिसम्म एकदम न्यून संख्यामा संक्रमण हुने गरेको थियो । तर गत दुई साता यता संक्रमितको संख्या क्रमिक रुपमा बढेको छ ।
संक्रमितको संख्यामा कमी हुँदै गर्दा आम मानिसले सतर्कता अपनाउने छाडेको थियो । तर अब संक्रमितको संख्या बढदैको अवस्था देखेर सतर्कता अपनाउन जरुरी रहेको छ ।
अब देशमा ओमिक्रोन नामक नयाँ भेरियन्ट पनि आइसकेकोले समयमै मानिसले आफ्नो बानी व्यवहारमा सतर्कता नअपनाए यो संख्या अझै बढने सक्नेछ । हुनत स्वास्थ्य निर्देशनालयले पुर्व तयारी गरेपनि सतर्कता अपनाउन दायित्व सबैको हो । उनले प्रदेशमा १ सय ३० भेन्टिलेटर, २ सय २४ आइसीयु बेड, ५ सय ८९ एचडियु बेड र १ हजार ३ सय २४ सामान्य बेडलाई तयारी अवस्थामा राखिएको उनले बताए ।
प्रदेश २ ले दैनिक रुपमा सार्वजनिक गर्दै आएको तथ्यांक अनुसार मंसिर १८ गते ३४ जना संक्रमित फेला परेको थियो । दैनिक क्रमिक रुपमा बढदै १५ दिनपछि सो संख्या बढेर ६५ पुगेको हो । सो तथ्यांक अनुसार मंसिर १८ गते ३४ जना संक्रमित मध्ये ३३ जना होम आइसोलेशनमा एक जना चिकित्सकको निगरानीमा उपचारत थिए । पुस ३ गतेमा भने प्रदेशमा ६५ जना कोरोनाको सक्रिय संक्रमित देखिएका छन । ती मध्ये ६२ जना होम आइसोलेशनमा रहेका छन् भने ३ जना चिकित्सकको निगरानीमा छन ।
स्वास्थ्य निर्देशनालयका अनुसार पुस ३ फेला परेका संक्रमित मध्ये धनुषाका मात्रै ३५ जना, महोत्तरीका १६, सिरहाका ५, सर्लाहीका ३, पर्साका ४, सप्तरी र बाराका १÷१ जना रहेका छन् ।
यो विषयमा आफ्नो प्रतिक्रिया दिनुहोस् !