जनकपुरधाम । अख्तियार दुरुपयोग अनुसन्धान आयोगले प्रदेश २ मुख्यमन्त्री कार्यालयद्वारा खरीद गरिएको साइकलमा अनियमितता भएको ठहर गरेको छ ।
सोमवार प्रदेश प्रमुख हरिशंकर मिश्रलाई प्रतिवेदन बुझाउन गएका बेला अख्तियारको बर्दिबास कार्यालयका प्रमुख कृष्णप्रसाद सापकोटाले संचारकर्मीहरुसँग कुरा गर्दै यस्तो ठहर गरेका हुन ।
प्रमुख सापकोटाले प्रदेश २ सरकारका मुख्यमन्त्री कार्यालयद्वारा बेटी बचाउ बेटी पढाउ अभियान अन्तर्गत खरिद गरिएका साइकलको छानबीनको क्रममा प्रारम्भिक अनुसन्धानमा अनियमितता भएको देखिएको बताए ।
उनले भने पहिलो चरणको अनुसन्धान सकिएको छ, जसको प्रारम्भिक अनुसन्धानमा अनियमितता भएको देखिएको छ अब विस्तृत अनुसन्धानका लागि अर्को चरणमा प्रवेश गरेका छौं, त्यसका लागि छुट्टै अधिकृत छनौट गरिएको छ, उहाँले गरेको अनुसन्धान अनुसार दोषीहरुमाथि कारवाही प्रक्रिया अघि बढाइनेछ ।
उनले भने विस्तृत अनुसन्धानमा पनि अनियमितता देखिएमा भ्रष्टाचार ठहर हुन्छ र तद्अनुरुप कानून संलग्न कर्मचारी, अधिकारी र पदाधिकारीमाथि मुद्दा दायर गरेर कारवाही प्रक्रिया थालिनेछ ।
संचारकर्मीहरुको जिज्ञासामा विस्तृत अनुसन्धानमा कम्तिमा एक डेढ महिना लाग्ने बताउंदै प्रमुख सापकोटाले बताए । सबै प्रक्रिया अपनाएपछि भ्रष्टाचार ठहर भएकाहरु विरुद्ध मुद्दा दायरको प्रक्रिया अघि बढाइनेछ । उनका अनुसार संलग्न कर्मचारी तथा पदाधिकारीको बयान लिने, विभिन्न किसिमको प्रमाण जुटाउने तथा परीक्षणपछि अभियोजन तयार गर्ने लगायतका कार्यहरु सम्पन्न गर्न एक डेढ महिनासम्म लाग्न सक्छ त्यो छानबीन अधिकारीमा निर्भर पर्छ ।
मुख्यमन्त्री बेटी पढाउ बेटी बँचाउ अभियान अन्तर्गत कक्षा ८ मा अध्ययनरत बालिकाहरुलाई वितरणको लागि खरिद गरिएको साइकलमा अनियमितता भएको भन्दै उजुरी परेपछि अख्तियारको टोलीले गत असोज १३ गते मुख्यमन्त्री कार्यालयमा छापा मारेको थियो । सोही दिन साइकल खरीद तथा वितरण सम्बन्धी सबै फाइल अख्तियारले नियन्त्रणमा लिई अनुसन्धान प्रक्रिया थालेको थियो ।
यो विषयमा आफ्नो प्रतिक्रिया दिनुहोस् !