जनकपुरधाम । धनुषाको धनौजी गाउंपालिका ४ को भडरिया स्थित श्री रा.प्रा.वि. भडरियामा करारमा शिक्षक भर्नाका लागि परीक्षा अगावै आर्थिक चलखेलमा नियुक्त हुने उम्मेदवार तय गरिसकिएको आरोप लगाइएको छ ।
परीक्षामा सहभागी हुने एक उम्मेदवार नाम नबताउने शर्तमा भने आर्थिक चलखेलको आधारमा शिक्षा विकास तथा समन्वय इकाई धनुषाका विद्यालय प्रशासन फांटका कर्मचारी रिना साहले विद्यालय प्रधानाध्यापकलाई प्रभावमा पारेर नियुक्त हुने उम्मेदवार परीक्षा अगावै छनौट गरिसकिएको छ ।
गत कात्तिक १० गते नै करार शिक्षक भर्ना हुनेहरुको परीक्षाका लागि मिति तय गरिएको थियो । तर परीक्षामा सहभागीमा हुने उम्मेदवारहरुले आर्थिक चलखेलमा उम्मेदवार तय गरिसकिएकोले विज्ञ परिवर्तनको मांग गर्दै आन्दोलन गरेपछि परीक्षाको मिति सारेर कात्तिक १५ गते सोमवारका लागि मिति तय गरिएको थियो ।
ती उम्मेदवारले भने आर्थिक चलखेलमा उम्मेदवार छनौट गर्ने गरी विज्ञ छनौट गरिएको भन्ने कुरा थाहा पाएपछि आफूहरुले पछिल्लो पटक कात्तिक १० गते आन्दोलन गरेपछि परिक्षा स्थगित गरी विज्ञ परिवर्तन गर्ने शर्तमा परीक्षाको मिति सारिएको थियो । परीक्षाको सेन्टर ज्ञानकुप माविबाट कन्या माविमा तय गरियो, तर सेटिङगको आधारमा छनौट गरिएको विज्ञ परिवर्तन गरिएको छैन ।
सो परीक्षाका लागि विज्ञको रुपमा बेंगाडावर मा.वि. का प्र. अ. विश्वनाथ महतो र बसहिया मा. वि. का शिक्षक शम्भु साहलाई चयन गरिएको छ । श्रोतका अनुसार चयन गरिएका विज्ञ साह विद्यालयका प्रधानाध्यापक अनिलकुमार साहका साढु हुन भने महतो हैप्पील्याण्ड बोर्डिंग स्कूलका जगदीश रायका नजिकका व्यक्ति हुन ।
आर्थिक चलखेलमा आफू अनुकुल शिक्षक उत्तिर्ण गर्न विज्ञहरु चयन गरिएको परीक्षामा सहभागी हुने उम्मेदवारहरुको दाबी छ । उनीहरुका अनुसार विद्यालयका कार्यालय सहयोगी रामसागर पासवानका छोरा अविनाश कुमार पासवान, जगदीश रायका छोरा रोशनकुमार राय र उपमेयर निकट दिनेश कुमार मण्डललाई शिक्षकमा नियुक्त गर्ने गरी विज्ञहरु राखिएको हो ।
असन्तुष्ट एक उम्मेदवारले भने आर्थिक चलखेलमा शिक्षक नियुक्तिका लागि उम्मेदवार छनौट गर्ने गरी विज्ञ राखिएको जानकारी शिक्षा इकाई समितिका प्रमुख र विद्यालय व्यवस्थापन समितिका अध्यक्षलाई जानकारी गराइसकेपनि कुनै चासो लिएको छैन ।
उनीहरुले विज्ञ परिवर्तनका यसअघि हामीले आन्दोलन गरेका थियौं तर त्यसलाई बेवास्ता गरिएको आरोप लगाउंदै यही विज्ञहरुको मातहतमा परीक्षा गरिए भने आफूहरु अदालत र अख्तियारसम्म जाने चेतावनी दिएका छन ।
कातिक ५ गते परीक्षा लिने गरि ठेरा मा.वि. का शिक्षक शिवनन्दन राय र यदुकोहा मा.वि. का शिक्षक सन्तोष महतोलाई विज्ञको रूपमा चयन गरिएको थियो । तिनीहरूको नाममा पत्र समेत काटि कातिक ४ गते काटि फांटमा चलानी समेत गरियो । तर आफू अनुकुल परीक्षा गर्न तिनीहरुलाई हटाएर महतो र साहलाई चयन गरिएको आरोप लाग्दै आएको छ ।
यो विषयमा आफ्नो प्रतिक्रिया दिनुहोस् !