जनकपुर, उच्च अदालत जनकपुरले धनुषाका हंसपुर नगरपालिका मेयर र प्रमुख प्रशासकीय अधिकृतलाई अदालतमा हाजिर हुन आदेश गरेको छ ।
उच्च अदालतले अन्तरिम आदेशको पालना नगरी मेयर रामज्ञान मण्डल र प्रमुख प्रशासकीय अधिकृत रामलोचन मण्डलले ठाडो चुनौती दिएको भन्दै ७ दिन हाजिर हुन आदेश जारी गरेको छ ।
प्रमुख प्रशासकीय अधिकृतमा सरुवा भएर आएका केशवकुमार अधिकारीलाई मण्डलद्वय मेयर र प्रमुख प्रशासकीय अधिकृतले आफूलाई हाजिर हुन नदिएको भन्दै उच्च अदालत दिएको मुद्दामा अदालतले भदौ ९ गते दुवैलाई हाजिर गराउन अन्तरिम आदेश जारी गरेको थियो ।
त्यसको केही दिनपछि भदौ २२ गते अधिकारीले अदालतको आदेशलाई अव्हेलना गर्दै आफूलाई हाजिर हुन नदिएको भन्दै अव्हेलना मुद्दा दर्ता गरेपछि अदालतका न्यायधिशद्वय हरिप्रसाद वाग्ले र रमेश ढकालको संयुक्त इजलासले मेयर रामज्ञान मण्डल र अधिकृत रामलोचन मण्डललाई ७ दिनभित्र अदालतमा उपस्थित हुन आदेश गरेको छ ।
यता मेयर मण्डलले भने आफूले अदालतलाई अव्हेलना होइन सम्मान गर्छौ, त्यहाँबाट दिइने आदेशलाई पालना गर्ने नै छु, दिएको समयावधि भित्र सप्रमाण उपस्थित हुनेछौ ।
उनले भने सरुवा भएर आएका अधिकृत अधिकारी कुनै छलफल वा कुरा नै नगरी अनाहक रुपमा पालिकालाई बदनाम गराउन घटनालाई बग्याएर अदालत धाई रहेका छन । मेयर मण्डलले घटनालाई प्रष्टयाउंदै भने बिना रवानाको अधिकारी आफू कार्यालयमा नरहेको बेला भदौ २ गते नै हाजिर हुन आएका थिए ।
सो बेला कर्मचारीहरुलाई थर्काउने लगायतका कार्य गरेको कारण उनको व्यवहारबाट असन्तुष्ट केही कर्मचारीले बिना रवानाको उपस्थित भएको हाजिर हुनबाट रोक लगाएको थियो । बिना रवानाको कर्मचारी र मेयर त के कानूनले पनि हाजिर हुन स्वीकृति दिदैन । त्यसपछि उनले भदौ ७ को मिति तोकिएको रवाना सहित कार्यालयमा हाजिर हुन नदिएको भन्दै अदालतमा मुद्दा दायर गरे । अदालतको अन्तरिम आदेशपछि भदौ १८ गतेका दिन अधिकारीकै उपस्थितिमा कार्यपालिकाको बैठक बसेर कार्यालयमा आई कार्यभार सम्भाल्न निर्णय नै गरियो ।
तर त्यसपछि उहाँ कार्यालय नै आई फेरी भदौ २२ का दिन आफूलाई हाजिर नगराएको भनी अव्हेलना मुद्दा गरायो । यदि उहाँलाई कुनै समस्या थियो भने आफू त्यहाँका प्रमुख हुँ कुरा राख्नुपथ्र्यो तर अहिलेसम्म कुनै कुरै नगरी पटक पटक अदालत गइरहेछ ।
मेयर मण्डलले भने अहिले पनि म भन्छु अदालत जानुपर्ने कुनै आवश्यकतै छैन, उहाँसँग रवाना चिट्ठी छ, कार्यपालिका बोर्ड बैठकबाट समेत निर्णय भइसकेको छ कुनैपनि आएर आफ्नो कार्यभार सम्भाल्न सक्नु हुन्छ ।
यो विषयमा आफ्नो प्रतिक्रिया दिनुहोस् !