जनकपुरधाम । आफूलाई कथित विकासे मेयरको रुपमा प्रचार गराउने धनुषाको शहीदनगर नगरपालिकाका मेयर उदर बरबरियाले नगरमा गरेको भ्रमण वापतको भत्ता र कानून विपरित गएको दुबई यात्राको नाममा लाखौ रुपैया अनियमितता गरेको पाइएको छ ।
महालेखा परीक्षकको कार्यालयले सार्वजनिक गरेको ५८ औं बार्षिक प्रतिवेदन अनुसार मेयर बरबरियाले आर्थिक वर्ष ०७६÷७७ मा ४ लाख ६९ हजार ९ सय र आफू सहित प्रशाकीय अधिकृतले गरेको दुबई भ्रमण वापत ४ लाख ७ हजार ७ सय २० रुपैया बुझेका छन ।
पदाधिकारी वा कर्मचारी विदेश भ्रमण गर्नु पर्दा नेपाल सरकार मन्त्रिपरिषदले निर्णय गर्नुपर्ने कानूनी व्यवस्था छ । तर, शहीदनगरका मेयर उदय कुमार यादव बरबरियाले निर्णय त परै जाओस नेपाल सरकारलाई जानकार समेत नगराई प्रशाकीय अधिकृतलाई लिएर निजी कामका लागि दुबई भ्रमण गरेका छन । पदाधिकारी तथा कर्मचारीले विदेश भ्रमण गर्नुको उद्देश्य समेत नखुलाई आफूखुशी भ्रमण आदेश स्वीकृत गराई ४ लाख ७ हजार ७२० रुपैयाँ भ्रमणको नाममा रकम झ्वाम पारेका छन ।
नगरप्रमुख बरबरिया र प्रमुख प्रशासकिय अधिकृत नन्दकुमार झाले २०७६ मंसिर ११ गतेदेखि २० गतेसम्म दुवइको सारजाँहासम्म भ्रमण गरेको नाममा सो रकम नगरपालिकाकै स्रोतबाट खर्च गरेको उल्लेख छ । तर नगरपालिका श्रोत होस वा सरकारी अनुदान कुनैपनि रकम खर्च गर्दा वैदेशिक भ्रमण गर्दा नेपाल सरकारको मन्त्रिपरिषदको निर्णय अनिवार्य चाहिन्छ कानूनी व्यवस्था छ ।
भ्रमण खर्च नियमावली, २०६४ अनसुार आफू कार्यरत क्षेत्रभित्र भ्रमण गर्दा दैनिक भ्रमण भत्ता नपाउने तथा एकै दिन गएर फर्किन सक्ने ठाउँमा खाजा खर्च वापत दैनिक भ्रमण भत्ताको २५% रकम लिन सक्ने कानूनी व्यवस्था छ । तर मेयर बरबरियाले सो कानूनी व्यवस्थालाई लत्याउंदै आफू अनुकुल नगरभित्र अनगुमनको नामा मेयर बरबरियाले दैनिक भ्रमण भत्तावापत ४ लाख ६९ हजार ९ सय रुपैयाँ अनौतिक तरिकाले बुझेका छन ।
यी बाहेक सो नगरपालिकाले दैनिक ७ हजार ८३८ रुपैयाँको दरले इन्धनमा मात्रै एक वर्षमा २८ लाख ६१ हजार १५५ रुपैयाँ खर्च गरेको छ । पदाधिकारीको इन्धनमा १५ लाख ६० हजार ३७९ र कार्यालय प्रयोजनमा १३ लाख ७७६ गरी कुल २८ लाख ६१ हजार १५५ रुपैयाँ इन्धनमा खर्च गरेको छ ।
स्थानिय तहका पदाधिकारी तथा सदस्यहरुको सुविधासम्वन्धी ऐनहरुमा पदाधिकारीहरुका लागि सल्लाहकार तथा सहायक कर्मचारी राखी पारिश्रमिक दिने व्यवस्था नरहेपनि मेयर बरबरियाले केशव यादव भन्ने व्यक्तिलाई कानुनी सल्लाहकारको नाममा ४ लाख ६७ हजार रुपैया खर्च गरेका छन । यादवलाई २०७६ साउनदेखि २०७७ असारसम्म काम गराइ मासिक ३५ हजार ९९० का दरले चाडपर्व खर्च समेत गरी कुल ४ लाख ६७ हजार ८७० रुपैयाँ भुक्तानी गरेको छ ।
यो विषयमा आफ्नो प्रतिक्रिया दिनुहोस् !